२८ असोज / अर्थ र व्यापार- ट्रेकिङ एजेन्सिज एशोशियसन अफ नेपाल (टान) को असोज २४ गते बसेको कार्यसमितिको ४६ औं पूर्ण बैठकले टानको ३९ औं वार्षिक साधारणसभा एवं निर्वाचन २०७४ कात्र्तिक १२ ( २९ अक्टोवर) मा बौद्ध स्थित हायात रिजेन्सि होटलमा गर्ने निर्णय गरेको छ । टान कार्यसमितिले साधारणसभा लम्व्याउन चाहेपनि व्यवसायिहरुको चौतर्फि दवाव पछि साधारणसभा घोषणा गरेको हो ।

यसअघि सेप्टेम्बरमा नै टानको साधारणसभा र निर्वाचन गर्नुपर्ने आवाज उठेपनि टानको वर्तमान कार्यसमितिले आफ्नो कार्यकाल समय बाँकी रहेको भन्दै साधारणसभा नगरेपनि कात्र्तिक १२ का लागी साधारणसभा तोकेको हो । तर अक्टोवर–नोभेम्बर नेपालको पर्यटन क्षेत्र र पदयात्रा पर्यटन व्यवसायिहरुको मुख्य सिजनको समय भएका कारण अधिकांश व्यवसायिहरु खुशी भन्दा पनि रुष्ट देखिएका छन । 

अर्थ र व्यापार संग कुरा गदै केहि पर्यटन व्यवसायीहरुले मुख्य सिजनमा ल्याएर टानको साधारणसभा गर्नु बद्नियपूर्ण रहेको र यहि समयमा साधारणसभा गरे कोरम सम्म नपुग्ने वताए । “मतदातालाई भोट हाल्ने अधिकार वाटै बञ्चित गर्ने उद्देश्यले साधारणसभा तोकेको देखिन्छ”–अर्का एक पर्यटन व्यवसायिले भने–“व्यवसायको प्रकृति र सिजन नबुझ्ने व्यक्तिहरु टानको नेतृत्वमा हुनुको फल मध्य सिजनमा टानको साधारणसभा तोकिनु हो ।” 

टानका सदस्यहरुको लागी टानको निर्वाचन भन्दा पनि आफ्नो व्यवसाय महत्वपूर्ण रहेको अर्का एक पर्यटन व्यवसायिले अर्थ र व्यापारलाई वताए । टानका केहि सदस्यहरुले भने समयैमा साधारणसभा तोक्नुलाई सकारात्मक भएपनि मध्य सिजनमा साधारणसभा गर्नु उचित नभएको प्रतिक्रिया दिएका छन ।

यद्यपी टानले साधारणसभा तोक्नु अगाडी देखि पर्यटन क्षेत्रमा क्रियाशील राजनीतिक दलहरु निकट व्यवसायिका संस्थाहरुले समिकरणको प्रयास गरेका छन । अधिकांश आकांक्षीहरु आफ्नै दलवाट सर्वसम्मत हुन बाँकी छ । अवको केहि दिनमा समिकरण निर्माण गर्दै आंकांक्षीहरु मध्ये वाट उम्मेदवारहरुको छनोट हुन सक्ने देखिन्छ । यता ट्रेकिङ एजेन्सिज एशोशियसन अफ नेपाल (टान) का अध्यक्ष चन्द्रप्रसाद रिजालले भने तोकिएको समयमा साधारणसभा नहुनुपर्ने कुनै कारण नरहेको वताए ।