३० जेठ/अर्थ र व्यापार- पर्वतारोहण संचालक संघ नेपालले यस वर्ष सगरमाथा र ल्होत्से हिमाल आरोहणका लागी डोरी टाँग्ने कार्यमा संलग्न आरोहीहरुलाई सम्मान प्रदान गरेको छ । संघले शुक्रबार आयोजना गरेको कार्यक्रममा संस्कृति,पर्यटन तथा नागरिक उड्ड्यन मन्त्रालयका सचिव मुकुन्द प्रसाद निरौला,पर्यटन विभागका महानिर्देशक रामकृष्ण लामिछाने र संघका अध्यक्ष डम्बर पराजुलीले सो कार्यमा संलग्न आरोहीहरुलाई नगद सहित प्रमाणपत्र समेत प्रदान गरेका थिए ।
कार्यक्रममा डोरी टाँग्ने र बाटो खोल्ने कार्यमा संलग्न व्यक्ति तथा कम्पनीहरुलाई समेत सम्मान प्रदान गरिएको थियो । हिमाल आरोहणका लागी बाटो खोल्ने र टोरी टाँग्ने कार्यमा संलग्न आरोहीहरुको विशेष महत्वपूर्ण भुमिका रहन्छ ।
कार्यक्रममा मन्त्रालयका सचिव मुकुन्द प्रसाद निरौलाले हिमाल आरोहणका लागी डोरी टाँग्ने र बाटो खोल्ने कार्यमा संलग्न व्यक्ति तथा आरोहीहरुको भुमिकाको प्रशंसा गर्दै मन्त्रालयले वर्षेनी उनीहरुलाई सम्मान गर्ने गरेको वताए । उनले यो विषयलाई आगामी दिनमा ऐनमा नै समेटेर जाने समेत वताए । त्यसैगरी आगामी दिनमा पर्यटन ऐनलाई समेत छिटोभन्दा छिटो संसदमा पठाउने तयारी भईरहेका समेत उनले बताए । उनले पर्यटन क्षेत्रमा कतिपय विकृतिहरु समेत देखापरेको उल्लेख गर्दै व्यवसायी र सरकार मिलेर नै ती विकृतिहरु रोक्नुपर्ने वताए । कार्यक्रमको संचालन संघका महासचिव ऋषिराम भण्डारीले गरेका थिए ।
तपाईको प्रतिक्रिया