३ भाद्र / अर्थ र व्यापार- ट्रेकिङ एजेन्सिज एशोशियसन अफ नेपाल (टान) को आगामी अध्यक्ष पदमा गंगापूर्ण ग्लासियर ट्रेक्स एण्ड एक्सपीडिसन प्रा.लि.का प्रबन्ध निर्देशक पूर्णचन्द्र भुषालले आफ्नो उम्मेदवारी घोषणा गरेका छन । टानको निर्वाचन आगामी भाद्र २० (सेप्टेम्बर ६) का दिन हुँदैछ ।

विगत ३१ वर्ष देखि पर्यटन व्यवसायमा आवद्ध भुषालले अंग्रेजीमा स्नात्तकोत्तर सम्मको औपचारीक अध्ययन पुरा गरेका छन । फ्रान्सवाट फ्रेन्च भाषामा डिप्लोमा सम्मको अध्ययन पुरा गरेका भुषालले यसअघि युनिट्राभको महासचिव रहेर समेत काम गरिसकेका छन । “टानको गरिमालाई जोगाएर संस्थाको उद्देश्य अनुसार अगाडी बढ्नु र आम सदस्यहरुको हितमा काम गर्नु आजको आवश्यकता हो”–अध्यक्षका आकांक्षी भुषालले भने–“सवै अग्रज व्यवसायीहरु र युवा व्यवसायी साथीहरुले पनि मलााई टानको नेतृत्व लिन सुझाव दिनुभएको हुँदा आफ्नो अनुभव, योग्यता र क्षमतालाई टान र नेपालको पदयात्रा पर्यटन क्षेत्रको विकासका लागी प्रयोग गर्न टानको अध्यक्षमा उम्मेदवारी दिन चाहेको हुँ ।” 

टान राजनीतिक फोरम नभई ट्रेकिंग एजेन्सीहरुको हक, हित र अधिकार संरक्षण गर्ने गैर नाफामूलक संस्थाको रुपमा काठमाडौं जिल्ला प्रसाशन कार्यालयमा दर्ता भएको छाता संगठन हो भन्ने यथार्थता प्रतिबिम्बित गराउने आफ्नो उद्देश्य रहेको उनले वताए । टानका सदस्य कम्पनीका प्रत्येक संचालकहरुको पूरा नाम, फोटो, कम्पनीको नाम र ठेगाना अंकित टान परिचयपत्र वितरण गर्ने, पर्यटकहरुको मात्रात्मक वृद्धि भन्दा गुणात्मक वृद्धिले रोजगारीमा वृद्धि, व्यवसायीहरुको जीवनस्तरमा सुधार र राष्ट्रिय आयमा वृद्धि गराउने यथार्थ बोध गराउने, ट्रेकर्स र नेपाली कामदार समेतको हित र सुरक्षालाई ध्यानमा राखी होस्टेल, गेस्ट हाउस, रेस्टुराँ, होमस्टे आदि विभिन्न संस्थाहरुबाट अवैध रुपमा संचालित गैरकानुनी ट्रेकिङ अपरेशनलाई निस्तेज पार्ने आफ्नो एजेण्डा रहेको भुषालले अर्थ र व्यापारलाई वताए ।

त्यसैगरी “नो ट्रेकिङ विथवाउट एजेन्सी” भन्ने नारा लागु गराउन सम्बन्धित निकायमा लबिंग गर्ने, दोहोरो कर प्रणालीको भारबाट ट्रेकिंङ व्यवसायीहरुलाई राहत दिलाउन सम्बन्धित निकाय संग यथासिघ्र वार्ता गर्ने, केही पर्यटन ऐन अस्पष्ट रहेकोले सम्बन्धित निकायलाई विश्वासमा लिई संशोधन गराउने, टिम्सलाई एकद्वार प्रणाली अन्र्तगत मात्र बिक्रि वितरण गर्ने गराउने परिस्थितिको निर्माण गर्ने आफ्नो एजेण्डा रहेको उनले वताए ।

“मजदूर भलाई कोष” स्थापना गरि ट्रेकिंङ पेशामा आश्रित मजदुर कर्मचारीहरुको दुर्घटना बिमा, तत्काल उद्दार बिमा, उपचार विमा र अनुदानको प्रभावकारी व्यवस्था गर्ने, टानलाई  संघिय मोडलमा लाने आफ्नो प्रमुख एजेण्डाहरु रहेको भुषालले वताए ।
विशेषरी कतिपय कामहरु सरकारलाई विश्वासमा लिएर मात्र गर्न सकिने अवस्था रहेकोले सरकारी निकायहरु संगको समन्वयमा यो क्षेत्रको विकासका लागी आँफुले सक्दो प्रयास गर्ने उनले वताए ।