२२ असार / अर्थ र व्यापार- काठमाडौंको सोह्रखुट्टे नयाँवजारमा बुटिक स्वरुप र शैलीमा निर्मित निभास बुटिक होम आगामी श्रावण १ गतेदेखि सञ्चालनमा आउने भएको छ । युवा पर्यटन व्यवसायी सुदर्शन नेपालले बुटिक होम निर्माण गरेका हुन । नेपाल एशोशियसन अफ टुर्स एण्ड ट्राभल एजेन्ट्स (नाट्टा) का कार्यसमिति सदस्य समेत रहेका नेपालले विगत लामो समयदेखि नेपालमा चीनियाँ पर्यटकहरु भित्र्याउँदै आएका छन ।

होटलमा पुराना झ्याल ढोका र काठहरुको प्रयोग गरिएको छ । “पर्यटकलाई घरमै बसेजस्तो अनुभुति होस भन्ने ढंगले होटलको निर्माण गरिएको छ, त्यसका साथै होटलमा हरेक बिहान पुजाआँचा,बेलुका आरति गर्ने गरिन्छ”–सञ्चालक नेपालले भने । पर्यटकहरुलाई नेपाली कला,संस्कृति र जीवनशैली समेत देखाउने हिसावले होटल सञ्चालन गरिने नेपालले अर्थ र व्यापारलाई वताए ।

निभास बुटिक होममा फेमिलि रुम,स्विट रुम र डिलक्स रुम रहेका छन । त्यसका साथै रुफ टप रेष्टुरेण्ट र एक सय जना क्षमताको सेमिनार हल समेत रहेको छ । हरेक रुमहरु पाँचतारे होटलको सेवा सुविधासरह रहने गरी तयार गरिएको नेपालले वताए । होटलमा नेपालमै उत्पादित अर्गानिक खाद्य पदार्थहरुको मात्र प्रयोग गर्ने होटलको तयारी छ ।