२३ मंसिर / अर्थ र व्यापार- राष्ट्रिय पर्यटन पत्रकार संघ (नाटोज) को शनिबार सम्पन्न चुमखोला विस्तारित बैठकले नाटोजलाई महासंघ बनाउने निर्णय गरेको छ । विस्तारित बैठकलाई सम्बोधन गर्दै नाटोजका अध्यक्ष शिव अधिकारी (अविरल) ले पर्यटन क्षेत्रमा कलम चलाउने सबै पत्रकाहरुलाई समेट्दै संस्थागत रुपमा पर्यटन प्रवद्र्धन र विकासमा योगदान पु¥याउनका लागि नाटोजलाई महासंघीय संरचनामा लैजानुपर्ने प्रस्ताव राखेका थिए । सो प्रस्तावलाई बैठकले अनुमोदन गरेसँगै नाटोजलाई महासंघीय ढाँचामा जाने बाटो खुलेको हो ।

विस्तारित बैठकमा नाटोजका मानार्थ सदस्य तथा नेपाल पर्यटन बोर्डका सञ्चालक समिति सदस्य दीपक महतले महासंघीय ढाँचामा गएपछि नाटोजको संस्थागत योजना तथा कार्यक्रम थप सशक्त हुने विश्वास व्यक्त गरे । महतले अहिलेको सरकारले विना पूर्वतयारी नेपाल भ्रमण वर्ष–२०२० घोषणा गरेको आरोप लगाउँदै लक्षित योजना पूरा हुन सक्नेमा आशंका व्यक्त गरे ।

पाल पर्यटन बोर्डका पूर्व सञ्चालक समिति सदस्य गणेश सिंखडाले नाटोजलाई महासंघ बनाउने घोषणाले नेपाली पर्यटन पत्रकारितामा नयाँ पृष्ठभूमि तयार पारेको वताए । त्यस्तै नेपाल योग एसोसिएशनका अध्यक्ष मोहन लम्सालले पर्यटन क्षेत्रका हरेक पक्षलाई उजागर गर्नका लागि नाटोजले खेलेको भूमिका उल्लेखनीय रहेको बताउँदै महासंघ बनेपछि थप सशक्त योजनाका साथ अघि बढ्नुपर्नेमा जोड दिए ।