१ भदौ/अर्थ र व्यापार–  नेपाल एशोसिएशन टुर्स एण्ड ट्राभल (नाट्टा) र नेपाल वायुसेवा निगमका प्रबन्ध निर्देशक तथा उच्च व्यवस्थापकहरु बिच आज भेटवार्ता भएको छ ।  

नाट्टाका अध्यक्ष सीएन पाण्डेको नेतृत्वमा नेपाल वायुसेवा निगमका प्रबन्ध निर्देशक तथा उच्च व्यवस्थापकलाई भेटेर नेपालको पर्यटन क्षेत्रको विकासका लागि राष्ट्रिय ध्वजावाहकको क्षमता अभिवृद्धि गर्न माग गरेको छ ।  

साथै नाट्टाले विदेशी विमान सेवासँग साझेदारीका लागि पहल गर्न पनि माग गरेको छ ।
नाट्टाले तेस्रो मुलुकलगायत युरोप, अमेरिकाजस्ता देशका शहरमा हाल नेपाल वायुसेवा निगमको सेवा नगन्य रुपमा रहेको हुँदा त्यस्ता गन्तव्यमा समेत सेवा विस्तार गर्न माग गरेको छ ।

नाट्टाले निगमद्वारा प्रदान गरिने आन्तरिक हवाई सेवाको भाडादर महङ्गो भएको, प्रमुख पर्यटकीय स्थलमा जानसमेत नमान्ने गरेको उल्लेख गर्दै सहज सेवा प्रदान गर्न र स्तरीय भाडादर कायम गर्न आग्रह गरेको छ ।

यस्तै, वायुसेवा निगमबाट सञ्चालित उडान ढिला हुने गरेकाले तत्काल यसको सम्बोधन हुनुपर्नेमा पनि नाट्टाले जोड दिएको छ ।
नाट्टाका प्रथम उपाध्यक्ष अच्युत गुरागाईले छिमेकी मुलुक चीनका विभिन्न शहरमा उडान भर्दा जहाज महङ्गो भएको भन्दै चीनसँग सिधा उडान भर्न सके नेपालमा चिनियाँ पर्यटक धेरै भित्राउन सकिने बताए । 

कंसाकारले नयाँ जहाज किन्नका लागि अर्थ मन्त्रालयबाट रु ६ अर्ब विनियोजन हुने प्रक्रियामा रहेको बताए ।  उनले रकम विनियोजन भएपछि नयाँ जहाज आउने र त्यसले पर्यटन विकासमा ठूलो सहयोग पुग्ने बताए । प्रबन्ध निर्देशक कंसाकारले तत्काल कोरिया, जापानलगायत मुलुकमा पनि निगमले सेवा विस्तार गर्ने बताए ।

भेटका क्रममा प्रबन्ध निर्देशक सुगतरत्न कंसाकारले नाट्टाले राखेको माग यथाशक्य चाँडो सम्बोधन हुने बताए ।