१९ असार / अर्थ र व्यापार - काठमाडौंको ठमेलमा ‘महानगरीय पर्यटन सूचना केन्द्र’ स्थापना गरिएको छ । नेपाल पर्यटन बोर्ड र नेपाल पर्यटक प्रहरी एकाइको संयुक्त लगानीमा काठमाडौंको ठमेलमा पर्यटन सूचना केन्द्र स्थापना गरिएको हो । पर्यटकहरूको सेवा र सुविधालाई थप प्रभावकारी बनाउने उद्देश्यका साथ स्थापना गरिएको सेवा केन्द्रमा पर्यटकहरूलाई सूचना दिने गरी हटलाइन सेवा र अनलाइन सेवाको पनि बुधबारदेखि सुचारु गरीएको छ । 
सूचना केन्द्रमा पर्यटकहरूको लागि आवश्यक सूचना ११४४ नम्बरको हटलाइन सेवाबाट निःशुल्क रूपमा उपलब्ध हुनेछ । केन्द्रको उद्घाटन गर्दै पर्यटन विभागका महानिर्देशक डण्डुराज घिमिरेले पर्यटन सेवालाई यी प्रविधिहरूले थप सहज बनाउने विश्वास व्यक्त गरे । 

कार्यक्रममा बोल्दै प्रहरी नायव महानिरीक्षक शैलेश थापा क्षेत्रीले प्रविधिको प्रयोगबाट बजारको सुरक्षा गर्न लागि आवश्यक सूचना केन्द्रहरूको स्थापना गर्ने कामलाई प्राथमिकता दिइएको बताए । उनले समुदायलाई आफ्नो क्षेत्रको सुरक्षाका लागि आवश्यक सचेतना अपनाउन पनि आग्रह गरे ।

पर्यटकलाई लक्षित गरेर निर्माण गरिएको टुष्टि पुलिस मोबाइल एप पर्यटनसम्बन्धी जानकारी एवं पर्यटकहरूको गुनासो तथा समस्यालाई सहज ढंगले सम्बोधन गर्ने उद्देश्यले निर्माण गरिएको हो । उक्त एप एन्ड्रोएड मोबाइलमा डाउनलोड गरेर प्रयोग गर्न सकिन्छ ।