१९ असोज / अर्थ र व्यापार संवाददाता- देशका विभिन्न पर्यटकियस्थलमा त्यहाँको स्थानिय निकायले उठाउन थालेको पर्यटन शुल्कको विरोधमा पर्यटन व्यवसायिहरु एकजुट भएका छन । विहिवार ट्रेकिङ एजेन्सिज एसोसिएशन अफ् नेपाल (टान) ले आयोजना गरेको “स्थानीय पर्यटन शुल्क : राष्ट्रिय पर्यटनमा असर तथा टिम्स सम्बन्धि अन्तरक्रिया” बोल्दै टानका अध्यक्ष चन्द्र प्रसाद रिजालले नेपालको पदयात्रा पर्यटन व्यवसाय अहिले निकै अप्ठ्यारो अवस्थामा रहेको वताए । रिजालले खुम्बु पासाङ ल्हामु गाउँपालिकाले जस्तै शुल्क उठाउँदै जाने हो भने पर्यटन व्यवसाय पलायन हुने, नेपालको अर्थतन्त्रमा नकारात्मक असर पर्ने र अन्तर्राष्ट्रिय स्तरमा समेत नेपालको गलत प्रचार हुने वताए । उनले यसरी गाउँपालिकाहरुले मनलाग्दी शुल्क उठाउँदा पनि पर्यटन मन्त्रालय चुप लागेर बस्दा आँफुहरु अचम्ममा परेको वताए ।

कार्यक्रममा बोल्दै टानका पूर्व अध्यक्ष तथा नेपाल पर्यटन व्यवसायि संघका अध्यक्ष दिपक महतले खुम्बु पासाङ ल्हामु गाउँपालिकाको निर्णय अपरिपक्व भएको वताउँदै नेपाल पर्यटन वोर्ड ऐनका आधारमा सञ्चालनमा आएको टिम्स एउटा गाउँपालिकाले खारेज गर्न नसक्ने वताए । गाउँपालिकाले शुल्क उठाए पनि टिम्स नउठाउन उसले आदेश दिन नसक्ने उनको भनाई थियो ।

सोलुखुम्बू जिल्लाको खुम्बू पासाङ ल्हामू गाउँपालिकाले गत अक्टोबर १ वाट प्रति पर्यटक दुई हजार रुपैयाँ उठाउन थालेको छ । कार्यक्रममा नेपाल पर्यटन वोर्डका सञ्चालक समितिका सदस्य कृष्ण अर्याल लगायत पर्यटन क्षेत्रका विभिन्न संघ–संस्थाका प्रतिनिधिहरुले यहि अवस्था रहे पर्यटन व्यवसाय सञ्चालन गर्न नसकिने वताए ।