१९ आषाढ/अर्थ र व्यापार– भारतको कोलकातास्थित नेपालको महावाणिज्य दूतावासले भारतको पश्चिम बंगाल स्थित पर्यटकिय केन्द मिरिकमा आयोजित तेस्रो ‘इन्डो–नेपाल फ्रेन्डसिप मिट’ सम्पन्न भएको छ ।

तेस्रो ‘इन्डो–नेपाल फ्रेन्डसिप मिट’मा प्रदेश नम्बर १ र उत्तर–पुर्वी भारतको पर्यटनको विकासका लागि दुबै देशका सरकारी अधिकारीले आवश्यक पहल थाल्ने प्रतिबद्धता व्यक्त गरेका छन् ।

भारतको कोलकातास्थित महावाणिज्यदूतावासका महावाणिज्यदूत एकनारायण अर्यालका अनुसार दुबै मुलुकका १ सय ७ प्रतिनिधि सहभागी भएको भेलाले मिरिक घोषणापत्र तयार पारेको छ । 

घोषणापत्रमा नेपाल सरकारले अघि सारेको नेपाल भ्रमण वर्ष २०२० लाई लक्षित गर्दै नेपाल र भारतबिचको पर्यटन सर्किटलाई प्रोत्साहन गर्ने उल्लेख गरिएको छ ।

पुर्वी नेपाल र बङ्गाल क्षेत्रको हिमाली पर्यटनमा वृद्धि गर्न सहकार्य गर्ने, सीमा क्षेत्रमा हुने अवैध मुद्रा सङ्कलनलाई बन्द गर्ने, दुबै मुलुकमा ग्रामीण पर्यटनलाई प्राथमिकता दिने र ग्रामीण क्षेत्रमा होम–स्टेको प्रवद्र्धन गर्ने घोषणा पनि कार्यक्रमले गरेको छ । 
घोषणापत्रमा होम–स्टेको प्रवद्र्धनका लागि तालिम कार्यक्रम सञ्चालन गर्ने, दुबै तर्फका पर्यटन व्यवसायीका लागि संयुक्त आचार–संहिता तयार गर्ने, इलाम–मिरिक–दार्जि्लिङ सडकलाई पर्यटनको मुख्य मार्ग बनाउने र पर्यटनको विकासका लागि स्थानीय वासिन्दाको सरोकार एवम् सहभागितामा जोड दिने उल्लेख छ ।

घोषणापत्रमा दुबै तर्फका ग्रामीण परम्परा, संस्कृति, प्रकृति, वास्तुकला, खाद्य पदार्थ र औषधीय वनस्पतिको संरक्षण गर्ने तथा भारतीय क्षेत्रमा पर्यटकको सूचना प्रहरीलाई दिने कामलाई सरल बनाउनु पर्ने बताइएको छ ।

कार्यक्रममा महावाणिज्य दूत अर्यालले नेपाल सङ्घीय प्रणालीमा गइसकेको उल्लेख गर्दै प्रदेशस्तरीय सरकारले आफ्नो प्रदेशमा पर्यटन क्षेत्रको विकासका लागि काम गर्नुपर्ने धारणा प्रकट गरे।

मिरिक नगरपालिकाका उपाध्यक्ष एमके जिम्बाले अहिले मिरिकको विकासका लागि पश्चिम बङ्गाल सरकारले एक सय करोड लगानी गरिरहेको जानकारी दिए ।

कार्यक्रममा झापा र इलामका प्रमुख जिल्ला अधिकारी, वन कार्यालयका प्रमुखसहित नेपालका पर्यटन व्यवसायी सरिक थिए।
भारततर्फबाट मिरिकका अधिकारी, सशस्त्र सीमा सुरक्षा बलका अधिकारी तथा भारतका पर्यटन व्यवसायीको सहभागिता थियो ।