१८ साउन/अर्थ र व्यापार– रविन्द्र अधिकारी पर्यटन मन्त्रीमा नियुक्त भएसंगै दुईवटा हेलिकोप्टर कम्पनीले संचालन अनुमति पाएका छन् ।

केही दिनअघि मात्रै आरएस हेलिकोप्टरले संचालन अनुमति पाएको छ । स्रोतका अनुसार आरएस कम्पनीले तीनवटा हेलिकोप्टर ल्याउनेछ । काठमाडौं बाहिरबाट उडान भर्ने गरि आरएस कम्पनीलाई स्वीकृति दिइएको छ ।  कम्पनीका अध्यक्ष राजकुमार साउद हुन् । यसअघि मुस्ताङ हेलिकोप्टरले अनुमति पाएको थियो । 

स्रोतका अनुसार अन्य २ हेलिकोप्टर कम्पनी अन्नपूर्ण र स्काईलाइन हेलिकोप्टरले पनि संचालन अनुमतिका लागि आवेदन दिँदैछन् । कम्पनी रजिष्ट्रार कार्यालय स्रोतका अनुसार केही हेलिकोप्टर कम्पनी दर्ताका लागि आवेदन दिएका छन्। 

अहिले १० वटा हेलिकोप्टर कम्पनीको ३० वटा भन्दा बढी हेलिकोप्टर संचालनमा आएका छन् ।  

नयाँ कम्पनीले नियमित उडान भर्न न्यूनतम छ महिना लाग्ने प्राधिकरणले जनाएको छ । प्राधिकरणले इन्जिनियरिङ म्यानुअल, सेफ्टी म्यानुअल, अपरेटीङ म्यानुअल लगायतका विभिन्न चरणहरु पार गरिसकेपछि मात्र एओसी पाउँछ । 

हवाई क्षेत्रमा सहज रुपमा अनुमति दिदा यसले दीर्घकालिन रुपमा हवाई क्षेत्रलाई असर पार्ने भएकाले सञ्चालन अनुमती दिंदा सजग हुनुपर्ने हवाई विज्ञहरु बताउछन् ।