११ माघ/ अर्थ र व्यापार - गणेश हिमाल पर्यटन विकास समिति (जिएचटिडीसी) ले गणेश हिमाल आरोहण दिवस मनाएको छ ।  पर्वतीय पर्यटनलाई प्रवद्र्धन गर्ने उद्देश्यले बिहीबार ठमेलको पक्नाजोलस्थित गोकर्ण हाउस रेष्टुरेण्टमा गणेश हिमाल आरोहण दिवस मनाएको हो । ७ हजार ४ सय २२ मिटर अग्लो गणेश हिमाल आरोहण सन् १९५५ जनवरी २४ मा स्वीजरल्याण्डका चार जना आरोहीहरु क्रमश रेमंड लम्बर्ट, पियरे भिट्टाज, एरिक गौचर र क्लाउड कोगनले पहिलो पटक ६४ वर्ष अगाडी सफलता पूर्वक आरोहण गरेका थिए ।

समितिका अध्यक्ष तेज बहादुर गुरुङको अध्यक्षतामा भएको उक्त कार्यक्रममा संघिय सरकारका वन तथा वातावरण मन्त्रि शक्ति बहादुर बस्नेतको प्रमुख आतिथ्य रहेको थियो । गणेश हिमाल आरोहण दिवसलाई सम्वोधन गर्दै गणेश हिमाल आरोहण दिवस मनाउनु ठुलो कुरा भएको बताए । साथै उनले त्यस भेगको पर्यटन प्रवद्र्धनको लागि कहाँ के गर्न सकिन्छ आफुले सक्दो सहयोग गर्ने प्रतिवद्धता जनाएका थिए ।

त्यसैगरि कार्यक्रममा प्रतिनिधिसभा सदस्य खेमप्रसाद लोहनी र प्रदेश सभासद जगत सिंखडाले यस क्षेत्रको प्रवर्द्धन र विकासमा सरकार र पर्यटन व्यवसायी मिलेर अघि बढ्नुपर्ने धारणा व्यक्त गरेका थिए । कार्यक्रममा नेपाली काँग्रेसका केन्द्रीय सदस्य भीष्म आङ्देम्बे, पूर्व गृहमन्त्री बुद्धिमान तामाङ, पूर्व पर्यटन राज्यमन्त्री परशुराम तामाङ, हिमाल आरोहणका जानकार आङ छिरिङ शेर्पा लगायत पर्यटन व्यवसायीहरुले गणेश हिमाल र यसका आसपासका हिमाल आरोहणका बारेमा जानकारी गराएका थिए ।

कार्यक्रममा समितिका संस्थापक अध्यक्ष एवम नेपाल पर्वतारोहण संघका महासचिव कुलबहादुर गुरुङले गणेश हिमाल आरोहण र यस क्षेत्रको विकासका सम्भावनाहरु धार्मिक, कला सांस्कृतिक, त्यस भेगमा रहेको विभिन्न खनिज र पर्यटकीय क्षेत्रका बारेमा विशेष जानकारी गराएका थिए ।

गणेश हिमाल १ देखि ६ सम्मका सबै हिमालहरुको सफल आरोहण भैसकेको भएपनि यसले व्यावसायिकता पाउन नसक्नु दुःखको कुरा भन्दै यसको प्रचार प्रसार र व्यावसायिक विकासका लागि आरोहण दिवस मनाईएको समितिका अध्यक्ष तेजबहादुर गुरुङले बताए । उनले आफू धादिङ जिल्लाको सिंगो पर्यटन क्षेत्रको बारेमा विकास गर्न सधैं अग्रसर भएर लाग्ने बताए ।
गणेश हिमाल क्षेत्रमा प्याल्दोर, लप्सङकर्पाे, पाविल सहितमा हिम चुचुराहरु रहेका छन् । देशको राजधानी काठमाडौंबाट नजिकको दुरीमा गणेश हिमाल क्षेत्र रहेकोले यसको प्रवद्र्धन र विकास गर्न सके राज्यले राम्रो आम्दानी गर्न सक्ने र छोटो दुरी र थारै दिनको प्याकेज बनाउन सकिने भएकाले गणेश हिमाल आरोहण गर्न पर्यटक तथा हिमाल आरोहीहरु आकर्षित हुनसक्ने पनि पर्यटन व्यवसायीहरुको धारणा रहेको छ ।

कार्यक्रममा गणेश हिमाल सफल आरोहण गर्ने आरोहीहरुलाई सम्मान गर्ने कार्यक्रम समेत राखिएको थियो । सफल आरोहीहरु सबै दिवंगत भैसकेका र परिवारका सदस्यहरु पनि आउन नसकेका कारण सम्मान कार्यक्रम भने पछि गरिने समितिका महासचिव राजेन्द्र प्रसाद सुवेदीले जानकारी दिए ।