२८ साउन/अर्थ र व्यापार– प्रतिनिधि सभाको आजको बैठकमा पर्यटन मन्त्रालयबाट गठित छानविन समितिले प्रतिवेदन बुझाइसकेको मन्त्री रविन्द्र अधिकारीले जानकारी गराएका छन् । 

पर्यटकहरुको फेक रेस्क्यु गरेर आर्थिक हिनामिना गरेको भन्दै पर्यटन तथा नागरिक उड्ड्यन मन्त्रालयले छानविन गरेको थियो ।

मन्त्री अधिकारीले प्रतिनिधि सभाको  बैठकमा आठवटा ट्राभल ट्रेकिङ् उद्धार कम्पनी, चारवटा अस्पतालहरु, तीनवटा हेलिकप्टर कम्पनीहलाई कारवाहीको प्रक्रिया अगाडि बढाइएको जानाकारी गराएका हुन् ।  

राजस्व चुहावट अन्तरगत पनि कारवाहीका लागि सिफारिस गरिएको मन्त्री अधिकारीले बताए । विदेशी मुद्राको कारोबार गर्न अनुमपति नलिएको देखिएको पाँच कम्पनी नाम नेपाल राष्ट्र बैंकलाई पठाइएको पनि उनले बताए ।

बैठकमा मन्त्री अधिकारीले अस्पतालहरुले मापदण्ड अनुसार उपचार शुल्क लिएको/नलिएको र चिकित्सकीय मर्यादा भित्र रही उपचार भएको÷नभएको विषयमा कारवाहीका लागि स्वास्थ्य जनसंख्या मन्त्रालयमा लेखि पठाइएको बताए ।

उद्धारमा संलग्नहरुको बारेमा नक्कली कागजात तयार पारी बीमा दावी गर्ने सम्बन्धमा छानविन गरी कारवाही गर्न गृह मन्त्रालयमा पत्राचार गरिएको बताए ।

छानविन समिति गठनपछि यस्ता क्रियाकलाप कमी भएको र आगामी दिनमा यस्तो कार्यलाई निरुत्साहित गर्न भदौ १५ भित्र निर्देशिका तयार पारिने मन्त्री अधिकारीले प्रतिनिधि सभामा जानकारी गराए ।