६ माघ/अर्थ र व्यापार– देशदर्शन बससेवा प्रालिले आन्तरिक पर्यटनलाई प्रवद्र्धन गर्ने उद्देश्यका साथ सोमवारदेखि काठमाडौं–पोखरा रात्रिकालीन पर्यटक बससेवा शुरु गरेको छ ।

कोभिड–१९ को संक्रमणका कारण थला परेको पर्यटन क्षेत्रलाई पुर्नस्थापित गर्नका लागि रात्रिकालीन बससेवा शुरु गरेको कम्पनीले जनाएको छ ।

प्रालिका कार्यकारी निर्देशक श्रीकान्त आचार्यले मुख्य–मुख्य पर्यटकीयस्थललाई लक्ष्य गरेर दिवा तथा रात्रिकालीन बससेवा सञ्चालन गरेको बताए ।

आचार्यले स्वदेशी तथा विदेशी पर्यटकलाई अत्याधुनिक सुविधासहित सेवा प्रदान गर्ने उद्येश्यका साथ १२ करोड लगानीमा १६ बस खरीद गरिएको जानकारी दिए ।

रात्रिकालीन पर्यटक बस काठमाडौंको बौद्धबाट साँझ ६.३० बजे छुट्छ भने पोखराबाट भने ७.३० बजे काठमाडौंको लागि छुट्नेछ ।

प्रालिले यसअघि नै काठमाडौं–जनकपुर, काठमाडौं–सुनौली र काठमाडौं–लुम्बिनी रात्रिकालीन पर्यटकीय बससेवा सञ्चालन गरिसकेको छ ।

प्रालिका बजार व्यवस्थापक प्रल्हाद लोहनीले आन्तरिक तथा बाह्य पर्यटकलाई बस चढ्नुअगाडि शरीरको तापक्रम मापन गर्ने, चालक, सहचालक यात्रुलाई मास्कको अनिवार्य व्यवस्था गर्ने, बसभित्र स्यानिटाइजर गर्नेलगायतका सम्पूर्ण व्यवस्था मिलाएकोे बताए ।

रात्रिकालीन बसको टिकट  देशदर्शन बससेवा प्रालिको वेवसाइट, नेट पे, लक्जरियर्स ट्राभल्स र इसेवामार्फत प्राप्त गर्न सकिन्छ ।