१९ पुस/अर्थ र व्यापार– विश्वव्यापी रूपमा फैलिएको कोरोना महामारीका कारण सन् २०२० मा २ लाख ३० हजार पर्यटक मात्रै नेपाल भित्रिएका छन् ।

सरकारले सन् २०२० लाई पर्यटन वर्ष घोषणा गर्दै २० लाख पर्यटक भित्र्याउने लक्ष्य राखेकोमा अघिल्लो वर्षको तुलनामा गतवर्ष पर्यटन आगमन ८० प्रतिशतभन्दा धेरैले घटेको हो ।

सन् २०१९ मा ११ लाख ९७ हजार पर्यटकले नेपाल भ्रमण गरेका थिए । सन् २०१८ मा भने ११ लाख ७२ हजार ७२ थियो ।

सरकारले २० लाख पर्यटक ल्याउने लक्ष्यका साथ सन २०२० लाई नेपाल भ्रमण वर्ष घोषणा गरेपनि कोरोना महामारीका कारण भ्रमण वर्ष नै स्थगित गर्नुप¥यो ।

कोभिड महामारीकै कारण गत वर्ष ९ महीनाभन्दा बढी समय नेपालले अन्तरराष्ट्रिय उडानमा प्रतिबन्ध लगाएको थियो । जसको असर पर्यटक आगमन दरमा पनि देखियो ।

अध्यागमन विभागक तथ्यांकअनुसार २०२० मा सबैभन्दा बढी पर्यटक भारतबाट २५ हजार ३२० जनाले नेपाल भ्रमण गरेका छन् । यसपछि चीनबाट ९ हजार ८०८ जना, अमेरिकाबाट ९ हजार ६८२ जना, थाइल्यान्डबाट ९ हजार ५१८ जना र म्यान्मारबाट ९ हजार ४०० जना पर्यटकले नेपाल भ्रमण गरेका छन् । 
सन् २०२० मा हवाई मार्ग त्रिभुवन अन्तरराष्ट्रिय विमानस्थबाट १ लाख ८३ हजार १३० जना पर्यटक नेपाल आएका छन् भने स्थलमार्ग हुँदै ४६ हजार ९५५ जना पर्यटक नेपाल आएका छन् । 

कोभिड–१९ को महामारी र बन्दाबन्दीका बीच कतारका राजकुमार शेख मोहम्मद विल अब्दुल्लासहितको टोलीले ६ हजार ८१४ मीटर अग्लो आमादब्लम हिमाल आरोहण र बहराइनका राजकुमार नासिर बिन हामिद अल खलिफासहितको रोयल फोर्सको टोलीले ८ हजार १६३ मीटरको मनास्लु हिमाल आरोहण गरेसंगै पर्यटन क्षेत्रमा थोरै आशा जागेको थियो । 

नेपाल पर्यटन बोर्डका प्रमुख कार्यकारी अधिकृत डा. धनञ्जय रेग्मीले कोरोना महामारीका कारण शिथिल बनेको पर्यटन क्षेत्रलाई पुनर्जीवित गर्न अब आन्तरिक पर्यटनमा जोड दिनुपर्ने बताए ।