१४ मंसिर/अर्थ र व्यापार– निजी क्षेत्रको वायुसेवा कम्पनी बुद्ध एयरले आठ महिनाको अन्तरालपछि माउन्टेन फ्लाइट सुरु गर्ने भएको छ।

आठ महिनापछि माउन्टेन फ्लाइट सुरु गर्न लागेको बुद्ध एयरले उडानको एउटा टिकट खरिद गर्दा अर्को टिकट निःशुल्क पाइने अफर ल्याइएको छ ।

कम्पनीका प्रवक्ता रुपेश जोशीले आगामी शनिबार (डिसेम्बर ५) देखि माउन्टेन फ्लाइट सेवा पुनः सुरु गर्न लागेको जानकारी दिए ।

जोशीले लगभग पहिलाकै भाडादरमा (प्रति व्यक्ति) प्रत्येक शनिबार यो सेवा ल्याएको बताए । उनले शनिबार साप्ताहिक बिदा हुने भएकाले सुरक्षित रुपमा रिफ्रेस हुन चाहने र पर्वतीय उडान गर्न रुचाउनेहरूलाई मध्यनजर गर्दै योजना ल्याएको बताए।

त्रिभुवन अन्तर्राष्ट्रिय विमानस्थल बेस रहेर करिब एक घण्टाको यो उडानमार्फत यात्रुले सगरमाथा, मकालु, गौरीशंकर लगायतका विभिन्न हिमश्रृंखलाको दृश्यालोकन गर्न सक्ने कम्पनीले जनाएको छ ।

कम्पनीका अनुसार माउन्टेन फ्लाइटका लागि ८ हजार ९ सय रुपैयाँ भाडादर कायम गरिएको छ । यो भाडादरमा ग्राहकले दुई वटा सिट (झ्याल सहित र झ्याल विनाको सिट) प्राप्त गर्न सक्नुेछन् ।

बन्दाबन्दी हुनु अघि कम्पनीले माउन्टेन फ्लाइटका लागि प्रति यात्रु १० हजार तीन सय रुपैयाँ लिँदै आएको थियो। यो अफरको योजना नेपाली नागरिकका लागि मात्रै लागू हुने कम्पनीले जनाएको छ।