१७ असार/अर्थ र व्यापार – संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपाल वायुसेवा निगमको सदृढीकरण अपरिहार्य रहेको बताएका छन् ।
मंगलबार निगमको ६७ औं वार्षिकोत्सव कार्यक्रममा मन्त्री पाण्डेले यस्तो बताएका हुन् । निगम अहिलेकै अवस्थाबाट संकटमुक्त हुन नसक्ने भन्दै उनले सुधारको आवश्यकता औंल्याए ।
‘ऐतिहासिक महत्व बोकेको र राष्ट्रको पर्यटन क्षेत्रको मेरुदण्डको रुपमा रहेको निगमको सुदृढीकरण आजको अनिवार्य आवश्यकता हो,’ उनले भने।
निगमले हाल दुईवटा वाइडबडी र दुईवटा न्यारोबडी विमानमार्फत भारतको नयाँदिल्ली, बेङ्लोर र मुम्बई तथा हङ्कङ, क्वालालाम्पुर, बैंकक, जापानको नारिता, कतारको दोहा, युनाइटेड अरब इमिरेटस (दुबई) र साउदी अरबको रियादमा उडान भर्दै आएको छ ।
निगमसँग आन्तरिक उडानका लागि दुईवटा ट्विनअटर विमान छन्। सो विमानको उडानबाट निगमले नाफा आर्जन गर्न सकेको छैन । जसका कारण निगमको ऋणको भार बढेको बढ्यै छ । निगमले विमान किन्न लिएको ३४ अर्ब ऋण बढेर ५२ अर्ब नाघिसकेको छ ।
मन्त्री पाण्डेले सरकार निगमको साथमा रहेको भन्दै व्यवस्थापनलाई परिणाममुखी काम गर्न निर्देशन दिए ।
तपाईको प्रतिक्रिया