६ असार/अर्थ र व्यापार– ल्याण्डमार्क भैरहवाले तीन तारे होटलको मान्यता प्राप्त गरेको छ । एल म्याग्रीफीको रिसोर्ट प्रालिले सञ्चालनमा ल्याएको ल्याण्डमार्क भैरहवाले पर्यटन ऐन २०३५ र र पथ प्रदर्शक नियमावली २०३८ अनुसार गत २१ जेठमा होटलको यो स्तर निर्धारण प्राप्त गरेको हो ।
पूर्वाधारका हिसावले चार तारेका लागि सबै सुबिधा उपलब्ध भए पनि १० वटा कोठा नपुगेका कारण तीन तारेको स्तर निर्धारण गरिएको पर्यटन विभागले जनाएको छ । चितवन, पोखरा र काठमाडौँमा ल्याण्डमार्क होटल सञ्चालन गरेर उत्कृष्ट सेवा प्रदान गर्दै आइरहेको ल्याण्डमार्कले गत माघदेखि भैरहवामा नयाँ होटल सञ्चालनमा ल्याएको हो ।
रूपन्देही सिद्धार्थनगर नगरपालिका – ३ को सिंगापुर कोलनीमा ल्याण्डमार्क भैरहवा सुरू गरिएको र तीन तारे स्तर प्राप्त गरिएको ल्याण्डमार्क होटल सञ्चालन गर्ने सम्राट ग्रुपका प्रमुख कार्यकारी अधिकृत सिएन पाण्डेले जानकारी दिए । उनले तीनतारे होटलको स्तर पाएपछि अझै यस होटलमा ग्राहकको विश्वासनीयिता बढ्ने बताए । हाल यस होटलले ५० कोठासहित सेवा बिक्री गरिरहेको छ ।
पाण्डेले होटलमा आउने पाहुनाका लागि भैरहवा विमानस्थलसम्मको आउने र जाने यातायातको सुविधा समेत रहेको बताए । उनले बेलहिया नाकाबाट समेत होटलले यातायात सुविधा उपलब्ध गराइरहेको जानकारी दिए ।
यस होटलका कतिपय कोठाबाट रिभरभ्यू समेत देख्न सकिने छ । केही कोठामा सूर्योदयको पहिलो किरण बेडमा पुग्नेगरी होटलको निर्माण भएको छ । होटलमा कोरोना बार र कोटियार्ड लाउञ्ज समेत रहेको ल्याण्डमार्क भैरहवाका महाप्रबन्धक बसन्त पुरीले जानकारी दिए । उनले जर्मन प्रविधिबाट होटलको निर्माण भएको भन्दै यस्तो शैलीको तारे होटल नेपालमै पहिलो पटक तयार भएको जानकारी दिए ।
यस होटलमा आकर्षक स्वीमिङ पुलदेखि रूफटप बारसम्म रहेका छन । होटल समूहमा छुट्टै पहिचान बनाउँदै गरेको सम्राट ग्रुपले ल्याण्डमार्क फरेस्ट पार्क सौराहाको उत्कृट होटलको रूपमा सेवा दिइरहेको छ भने कास्कीमा ल्यण्डमार्क पोखराले पनि फेवातालको किनारबाट उत्कृष्ट सेवा दिइरहेको छ ।
हाल यो होटल आन्तरिक र बाह्य दुबै पर्यटकका लागि आकर्षण बन्दै गएको ल्याण्डमार्कले आगामी दिनमा नेपालका अन्य स्थानहरूमा समेत होटलहरू सञ्चालनका लागि सम्भाव्यता अध्ययन गरिरहेको सम्राट ग्रुपका प्रमुख कार्यकारी अधिकृत पाण्डेले जानकारी दिए ।
सम्राट ग्रुपले आन्तरिक पर्यटन प्रर्वधनमा जोड दिने सरकारको नीतिलाई साथ दिँदै नयाँ वर्ष र चाडपर्व लक्षित आकर्षक अफरहरू समेत दिने गरेको छ । विदा र चाडपर्वको समयमा घुम्न निस्कने आन्तरिक पर्यटकका लागि राहत दिने उद्देश्यले यस्तो अफरहरू सार्वजनिक गर्ने गरिएको र यसलले निरन्तरता पाउने प्रमुख कार्यकारी अधिकृत पाण्डेले बताए ।
ल्याण्डमार्कको एकमात्र उद्देश्य आफ्ना पाहुनाका लागि उत्कृष्ट सेवा दिने रहेको बताउँदै प्रमुख कार्यकारी अधिकृत पाण्डेले पर्यटकको रूची पूरा गर्न जुनसुकै समयमा पनि ल्याण्डमार्क काठमाडौँ, पोखरा, चितवन र भैरहवा तयार रहेको बताए । उनले सेवाको गुणस्तरमा कहिल्यै कुनै सम्झौता नहुने बताए ।
ल्याण्डमार्क होटल सञ्चालन गर्ने सम्राट ग्रुप अफ कम्पनी नेपालको पर्यटन क्षेत्रमा अग्रपंतिमा रहेको सो होटलले जनाएको छ ।