१७ जेठ/अर्थ र व्यापार – मंगलबार सार्वजनिक भएको नयाँ बजेटबाट पनि सरकारले हवाई भाडादरमा भ्याट नहटाएकोमा नेपाल एशोसियशन अफ टुर एण्ड ट्राभल एजेन्ट्स ‘नाट्टा’ले असन्तुष्टि जनाएको छ । लामो समय देखि भ्याट फुकुवा गर्नका लागि माग गरिए पनि आर्थिक वर्ष २०८१/८२ को बजेटले त्यसलाई सम्बोधन नगरेको भन्दै नाट्टाले यस्तो असन्तुष्टी जनाउँदै अब कानुनी उपचारमा जाने चेतावनी दिएको हो ।
नाट्टाले विज्ञिप्ति मार्फत यो बजेटप्रति आफ्नो गम्भिर ध्यानाकर्षण भएको जनाएको छ । हवाई भाडादरमा भ्याट लागू यथावत भएसँगै पर्यटन क्षेत्रसंघसँग आबद्ध विभिन्न कम्पनीसँगै मुलुकको पर्यटन क्षेत्रमै दीर्घकालीन र अल्पकालीन नकारात्मक असर पर्ने नाट्टाका अध्यक्ष रमेश थापाले बताए।

उनले टान, हान, नारा, नेपाल उद्योग वाणिज्य महासंघ, नेपाल चेम्बर अफ कमर्श, नेपाल उद्योग परिसंघ, सहितका संघ संस्थाहरुले समेत आफूहरुको मागमा ऐक्यबद्धता जनाएको जानकारी गराउँदै यस विषयमा सम्बन्धित मन्त्रालयका मन्त्रीसँगै सचिव र सांसदहरुसँग पनि छलफल भएको तर, सकारात्मक जवाफ नआएको बताए ।

‘भ्याट एक निर्दिष्ट करमा मात्र सिमित कर होइन। यसका बहुआयामिक प्रभाव पर्छ भन्ने ध्रुव सत्यलाई सरोकारवाला निकायले ध्यान नदिँदा व्यवसायीहरु तथा हवाई यात्रुहरुलाई धेरै ठूलो आर्थिक भार परेको छ,’अध्यक्ष थापाले भने,’सरकारलाई सयौं पटक यस बारेमा विभिन्न तह, तरिकाबाट समग्र व्यवसायमा परिरहेको प्रभावबारे जानकारी गराँइदा आश्वासन मात्र प्राप्त भयो। सुतेको लाई जगाउन गाह्रो हुन्न तर सुतेको जस्तो गर्नेलाई जगाउन सकिन्न उखान सत्यतामा परिणत भएको देखिन्छ।’

देशमा सडकको अवस्था राम्रो नभएको र निर्माण सम्पन्न भएका भैरहवा तथा पोखरा अन्तर्राष्ट्रिय विमानस्थल संचालन हुन नसकेको अवस्थामा भ्याट कायमै राखेर सरकारले १६ लाख पर्यटकको लक्ष्य राख्नु अपत्यारिलो रहेको नाट्टाले जनाएको छ ।
हवाई भाडादर दिन २ गुणा रात ४ गुणाको हिसाबले बढी रहँदा पर्यटकहरुको नेपाल यात्रा आकर्षण कम हुने र वैकल्पिक गन्तव्य प्रति जाने प्रवृत्ति बढेको देखिन्छ भन्दै नाट्टाले नेपालमा हवाई यात्रु तथा व्यवसायीहरुमा आर्थिक रुपले वृद्धि भइरहेको तथा संलग्न व्यवसायी समेत विस्थापित हुने वातावरण सिर्जना भएको धारणा राखेको छ ।