१७ वैशाख/अर्थ र व्यापार – यसपालीको बसन्त ऋतुकालागि सगरमाथाको चौथो क्याम्पसम्म बाटो बनाउने काम सम्पन्न भएको छ । पर्यटन विभागका अनुसार वसन्त ऋतुमा सगरमाथा, ल्होत्सेलगायतका हिमालको आरोहण सहज बनाउन डोरी टाँग्ने कामको जिम्मेवारी पर्वतारोहण संघ नेपालको व्यवस्थापनमा सेभेन समिटले पाएको थियो ।
यसपाली सगरमाथा आधार शिविरको क्याम्प २ देखि सगरमाथा चुचुरोसम्म बाटो बनाउन खटिएको टोली आइतबार अपरान्ह २ बजेर २० मिनेटमा चौथो क्याम्प (साउथ कोल) पुगेको विभागले जनाएको छ ।
विभागका अनुसार अब साउथ कोल (७,९५० मिटर) सम्म बाटो खुला भएको छ । सगरमाथा आधार शिविरमा अहिले आरोही र उनीहरुको सहयोगीहरू पुग्ने क्रम जारी छ ।
विभागको पछिल्लो तथ्यांक अनुसार यस सिजनका लागि कुल ९५ टोलीका ८६१ जना आरोहीले २७ वटा हिमाल आरोहण गर्न अनुमति लिएका छन् । यसमध्ये सगरमाथामा ३७ टोलीका ३९० जनाले अनुमति लिएका छन् ।