२७ पुस/अर्थ र व्यापार – पूर्व संस्कृति,पर्यटन तथा नागरिक उड्डयनमन्त्री जीवनराम श्रेष्ठले पर्यटन क्षेत्रको विकासकालागि केन्द्रदेखि स्थानीयतहसम्मका सबै सरकारी निकाय एउटै लयमा हिंड्नुपर्ने बताएका छन । उनले यसकालागि पर्यटन क्षेत्रको पुराना नीतिलाई संसोधन गर्दै अहिले आवस्यक ऐन बनाउँदै जानुपर्नेमा वर्तमान सरकारले पर्यटनमैत्री लय समाउन नसकेको बताए ।
केन्द्रिय पर्यटन विभाग नेकपा एकीकृत समाजवादी पार्टीले शुक्रबार राजधानीमा आयोजना गरेको ‘सवल पर्यटन उद्योग, समृद्ध नेपाल’समाजवादी अर्थ व्यवस्था पर्यटन उद्योग संवाद कार्यक्रममा पूर्व पर्यटनमन्त्री श्रेष्ठले यस्तो बताएका हुन । आफु पर्यटनमन्त्री हुँदा गरेका विविध पर्यटन प्रवद्र्धनात्मक कार्यक्रमहरुका बारेमा जानकारी गराउँदै उनले आफ्नो कार्यकालमा थालनी गरिएका केही पर्यटन क्षेत्रको संरचनागत सुधारका कार्य अहिलेसम्म अपेक्षाकृत रुपमा अघि नबढेकोमा गम्भिर चिन्ता व्यक्त गरे ।

उनले पर्यटनको नीति संघियतामा जाँदा थप समस्या जेलिएको बताए । उनले यस्तो समस्या समाधानकालागि समयअनुकुलको संरचनागत विकास आवस्यक भएको बताए ।
समानबादी पार्टीका उपमहासचिव तथा अर्थ विभाग प्रमुख डा. विजय पौडेलले आर्थिक विकासको मुख्य आधार पर्यटन क्षेत्रको विकासकालागि देसका सबै योजना रोजगारी बढ्ने खालको हुनुपर्ने धारणा राखे । उनले रोजगारी मुखी पर्यटन विकास भएमा मात्र यहाँका युवा जनशक्ति नबाहिरिने बताए ।

नेपाल पर्वतारोहण संघका अध्यक्ष निमानुरु शेर्पाले अझै नेपालले अपेक्षाकृत रुपमा हिमालको प्रवद्र्धनात्मक एवं व्यवस्थापनको काम गर्न नसकेकाले पर्यटनको उचित लाभ लिन नसकिएको बताए । अहिलेसम्म साना ठुलागरि जम्मा ४०५ वटा हिमालको आरोहण खुल्नु सरकारको नीतिगत कमजोरी भएको बताउँदै शेर्पाले भने, ‘ सरकारले जतिसके धेरै हिमालको आरोहण खोल्नुपर्छ ।’ हिमाली क्षेत्रको प्रवद्र्धन र विकास बिना पर्यटनबाट लाभ लिन नसकिने भन्दै उनले यसमा सरकार गम्भिर हुनुपर्ने बताए ।

नेपाल पर्यटन बोर्डका प्रमुख कार्यकारी अधिकृत डा. धनन्जय रेग्मीले मुलुकको पर्यटन क्षेत्रको विकासकालागि अहिलेसम्म भएका विविध गतिविधीहरुका जानकारी गराएका थिए ।
सो कार्यक्रममा पर्यटन क्षेत्रसित सम्बन्धीत विभिन्न संघ संस्थाका प्रतिनिधीहरुको सहभागीता रहेको थियो ।