४ पुस/अर्थ र व्यापार – राष्ट्रिय ध्वजाबहाक नेपाल वायुसेवा निगमले एक वर्षमा सवा २२ अर्ब रुपैयाँ आम्दानी गरेको छ । मंगलबार एक विवरण सार्वजनिक गर्दै निगमले गत आर्थिक वर्ष २०७९÷८० मा २२ अर्ब २४ करोड १९ लाख ७८ हजार रुपैयाँ आम्दानी भएको जानकारी गराएको हो ।
कोरोना विश्व महामारीको समयमा घटेको निगमको व्यापारको अवस्था सामान्य भएसँगै अहिले वृद्धि भएको सो विवरणमा देखिएको छ ।
कोरोना विश्व महामारिको उच्च चपेटामा परी पर्यटक आगमन प्रभावित भएको समय आव २०७७÷७८ मा ९ अर्ब १० करोड ९७ लाख रुपैयाँ आम्दानी गरेको निगमले आव २०७८÷७९ मा १६ अर्ब ४६ करोड रुपैयाँ आम्दानी गरेको थियो ।
निगमसँग अहिले अन्तर्राष्ट्रिय उडानमा सञ्चालित चारवटा विमान छन् । यसैगरी, आन्तरिक उडानतर्फ २ वटा विमान मात्र उड्न योग्य अवस्थामा छन् । यसबाहेक तीन वटै अन्तर्राष्ट्रिय विमानस्थलमा ग्राउण्ड ह्याण्डलिङ समेत निगमको अर्को मुख्य आम्दानीको स्रोत हो ।