१५ भदौ/अर्थ र व्यापार –  ‘टुरिस्ट बस नेपाल एप्स’ सञ्चालनमा आएको छ । यो एप सञ्चालनमा आएसँगै अब आन्तरिक तथा बाह्य पर्यटकले अनलाइन मार्फत बस टिकट खरिद गर्न पाउने भएका छन्।
टुरिस्ट बस एशोसियशन अफ नेपालले काठमाडौमा आयोजित कार्यक्रममा सो एप्स को औपचारिक शुभारम्भ गरेको हो । एसोसियसनले आफ्नै मोबाइल एप्स निर्माण गरी आन्तरिक तथा बाह्य पर्यटकलाई अनलाइनमार्फत टिकट खरिद गर्ने व्यवस्था मिलाएको जनाएको छ ।
एसोसियसनका अध्यक्ष कृष्ण आचार्यले यसअघि विभिन्न अनलाइन माध्याममार्फत टिकट खरिद गर्दै आएका पर्यटकको सुविधाका लागि बुधबारबाट ‘टुरिस्ट बस नेपाल’ एप्समार्फत टिकट काट्न मिल्ने व्यवस्था गरेको जानकारी दिए ।
आन्तरिक तथा बाह्य पर्यटक नझुक्किउन र उनीहरुलाई टिकट खरिदमा सहजता होस् भन्ने उद्देश्यले यो एप्स संचालनमा ल्याएको बताउँदै आचार्यले भने, ‘यस एप्स मार्फत आफू जान चाहेको बसको टिकट, सिट नं र स्थानकोबारेमा सहजै जानकारी लिएर टिकट लिन सकिनेछ।’
एसोसियसनका प्रथम उपाध्यक्ष भीष्म न्यौपानेले हाल काठमाडौँबाट पोखरा, चितवनको सौराहा, लुम्बिनी, जनकपुर तथा पोखरादेखि लुम्बिनी र सौराहामा झण्डै एकसयवटा पर्यटकीय बसले सेवा प्रदान गर्दै आइरहेको जानकारी गराए ।
यसैगरी, महासचिव मिलन नेपालले संसारको जुनसुकै ठाउँमा बसेर अनलाइन मार्फत खरिद गर्न मिल्ने यो एप्स पर्यटक बसको टिकट बुकिङ तथा खरिदकालागि एकदमै उपयोगी र फलदायी हुने दावी गरे ।
उनले एसोसियसनले आगामी असोजदेखि पोखरादेखि मुक्तिनाथसम्म पर्यटकीय बस संचालन गर्ने तयारी थालेको बताए । एसोसियसनका अनुसार हाल काठमाडौंमा पर्यटकीय बसका लागि छुट्टै बसपार्क नहुँदा अस्थायी रुपमा सोह्रखुट्टेस्थित खुसिबु सडकबाट संचालन हुँदै आएका छन्।