३ भदौ/अर्थ र व्यापार – मुलुकको राष्ट्यि ध्वजाबाहक नेपाल वायुसेवा निगमलले आफ्नो ११ औं अन्तर्राष्ट्रिय गन्तव्यका रुपमा साउदी अरेबियाको दमाममा थप उडान विस्तार गर्ने भएको छ । जसकालागि निगमले अहिले नै व्यवसायीक उडान तालिकाको मिति समेत तय गरिसकेको छ ।

यस गन्तव्यका लागि निगमले शनिबारबाट हवाई टिकट बुकिङ खुला गरेको वायुसेवा निगमले जनाएको छ । निगमका प्रवक्ता रमेश पौडेलले यस्तो जानकारी गराएका हुन । निगमका अनुसार आगामी २० भदौबाट नियमित व्यवसायीक उडान सुरु हुने भएको छ ।
यस नयाँ रुटमा साताको दुई दिन बुधबार र शनिबार निगमको विमानले उडान भर्ने भएको छ । आगामी दिनमा यस रुट लगायत विभिन्न ठाउँमा यात्रुहरुमा देखिने चाप र थप माग अनुसार गन्तव्य विस्तार गरिने निगमले जनाएको छ ।

अहिलेलाई ‘काठमाडौं–दमाम एकतर्फी प्रमोसनल फेयर’ प्रतियात्रु ३५ हजार रुपैयाँ तोकिएको छ । यसैगरी, साउदी अरेबियाको दमाम–काठमाडौंका लागि भने प्रति यात्रु ५९५ साउदी रियाल फेयर मुल्य तोकिएको छ ।
वैदेशिक रोजगारीको लागि आकर्षक गन्तव्यमुलक साउदी अरब धेरै नेपाली कामदार रोजगारीमा जाने रोजगारदाता गन्तव्य देस हो । निगमले थप विस्तार गरेको यस नयाँ गन्तव्यको उडान सेवाले अब नेपालीहरुको आवतजावतलाई ठूलो राहत पुग्ने अपेक्षा गरिएको निगमले जनाएको छ ।