११ जेठ/अर्थ र व्यापार – मुलुकको राष्ट्रिय ध्वजाबहाक नेपाल वायुसेवा निगमले उडान विस्तार गर्न लागेको क्वालालाम्पुर–भैरहवा रुटको प्रमोशनल भाडादर ह्वात्तै घटाएको छ । सुरुवातमा १२ हजार ७ सय रुपैयाँ तोकेको यस रुटको भाडा अब जम्मा ११ हजार ४६१ रुपैयाँमा झारिएको निगमले जनाएको छ ।
निगमका अनुसार हाल काठमाडौंबाट क्वालालाम्पुर जाने ए ३२० विमान क्वालालाम्पुरबाट भैरहवा अवतरण गर्ने छ । त्यसपछि सोही विमान भैरहवाबाट काठमाडौं आउने छ ।
यो गौतमबुद्ध विमानस्थलबाट निगमले गर्न लागेको पहिलो नियमित तथा व्यावसायिक उडान हुने छ । यस रुटमा आगामी २९ जेठबाट निगमले सातामा एक उडानको तयारी गरेको छ । व्यावसायिक सम्भाव्यताका आधारमा निगमले अझै यस रुटमा उडान संख्या बढाउने बताएको छ ।

क्वालालाम्पुर–भैरहवा–काठमाडौं रुटको हवाई भाडा भने मात्र १२ हजार ३४६ रुपैयाँ तोकिएको छ । यसअघि सार्वजनिक यो रुटको भाडादर प्रति यात्रु १४ हजार ७२० रुपैयाँ थियो । यस रुटमा सवार विमानका यात्रुले ४५ केजी ब्यागेज निःशुल्क बोक्न सक्ने व्यवस्था गरिएको निगमले जनाएको छ ।