३ बैशाख /अर्थ र व्यापार – मुलुकको राष्ट्रिय ध्वजाबहाक नेपाल वायुसेवा निगमले आगामी जेठको दोस्रो सातादेखि भैरहवाबाट दिल्ली र क्वालालाम्पुरमा शिधा उडान भर्ने भएको छ । जसकालागि अहिले आवस्यक तयारीमा जुटेको निगमले आगामी जेठ दोस्रो सातादेखि भैरहवालाई दुई गन्तव्यमा जोड्ने भएको हो ।
निगमका प्रवक्ता रमेश पौडेलले भैरहवास्थित गौतमबुद्ध अन्तर्राष्ट्रिय विमानस्थलबाट दिल्ली र क्वालालाम्पुरमा नियमित उडानको तयारी गर्न टास्क फोर्स गठन गरिएको बताए । यहि तालिका अनुसार आगामी जेठ दोस्रो सातादेखि कम्तीमा दुईवटा गन्तव्यमा उडान सुरु गरिने उनले जानकारी दिए ।
पौडेलले आवश्यक उडान अनुमति,जनशक्ति,प्राविधिक तयारी, बजारीकरण लगायत कार्यलाई तीब्रता दिई समयमै काम सक्न निगमका कार्यकारी अध्यक्ष युवराज अधिकारीले वाणिज्य विभागका उपनिर्देशक सन्तोष पाण्डेको नेतृत्वमा स्पेशल टास्क फोर्स गठन गरेको जानकारी दिए ।
उनले आवश्यक उडान अनुमतिका लागि सम्बन्धित देशहरूमा समन्वयको कार्य अगाडि बढाइसकेको र अनुमति आउनासाथ बकिङ खुल्ला गरिने बताए । दुई मुलुक र इनरुट पर्ने मुलुकमा आवश्यक पर्ने अनुमतिका लागि निवेदन दिइसकेको जानकारि गराउँदै पौडेलले भने,‘सातामा कम्तीमा एकउडान हुने गरी प्रक्रिया अगाडि बढेको छ ।’
निगमका अनुसार अब थप यात्रुको चाप बढ्यो भने उडान संख्या बढाइने छ । निगमले यी दुई गन्तव्यबाट अहिले काठमाडौंमा भने नियमित उडान भरिरहेको छ । भैरहवास्थित लुम्बिनी अन्तर्राष्ट्रि विमानस्थलबाट अहिले जजिरा एयरले मात्र नियमित उडान भरिरहेको छ । निगमले दुवै रुटमा ए ३२० विमान प्रयोग गर्ने गरी तयारी गरिरहेको छ ।