१३ असार /अर्थ र व्यापार – थाइल्याण्डको थाई स्माइल एयरवेजले आगामी शुक्रबारदेखि काठमाडौं–बैंकक नियमित उडान सुरू गर्ने भएको छ । थाई स्माइलले नेपालमा पहिलो पटक आगामी शुक्रबारबाट नियमित उडान सुरू गर्न लागेको हो ।
यस वायुसेवा कम्पनीको उडानसँगै दुई वर्षपछि नेपाल–थाइल्याण्डमा सिधा हवाई सञ्जालमा जोडिँदै छ । सो समयअघि मुलुकको राष्ट्रिय ध्वजाबहाक नेपाल वायुसेवा निगम र थाई एयरवेजले काठमाडौबाट बैंककलालागि सिधा उडान भर्दै आएको थियो । यस वायुसेवाको सेवा विस्तारले अब पुनः यस रुटमा रोकिएको उडान सुरु हुने भएको छ ।
नेपाल नागरिक उड्डयन प्राधिकरणले यस एयरवेजलाई साताको सातै दिन उडान अनुमति दिएको जनाएको छ । प्राधिकरणका प्रवक्ता जगन्नाथ निरौलले आफ्नो नेपाल उडान सेवा विस्तारको क्रममा सबै प्रक्रिया पूरा गरेको थाई स्माइलले आगामी शुक्रबारबाट साताको सबैदिन उडान भर्ने अनुमति पाएको बताए ।
नेपालका लागि थाई स्माइलको आधिकारिक जिएसए सोसाइटी इन्टरनेशनल ट्राभल हो। यो गन्तव्य उडानका लागि माग राम्रो रहेकाले आगामी शुक्रबारबाट काठमाडौं–बैंकक पहिलो व्यवसायीक उडान तयारीका साथ सेवा सुरू गर्न लागेको सो एयरलाइनसका नेपालस्थित आधिकारिक जिएसए सोसाइटी इन्टरनेशनल ट्राभलले जनाएको छ ।

आधिकारिक जिएसए सोसाइटी इन्टरनेशनल ट्राभलले जानकारि गराए अनुसार यो थाई स्माइल थाई एयरवेजकै भगिनी कम्पनी हो । थाई स्माइलले सन् २०१२ जुलाईबाट व्यावसायिक उडान सुरू गरेको थियो । थाई स्माइलले थाइल्याण्डका १२ गन्तव्यसहित कम्बोडिया, चीन, हङकङ, ताइवान, लाओस, मलेसिया, म्यानमार, भारत र भियतनामका २० गन्तव्यमा नियमित व्यवसायीक उडान भरिरहेको छ ।