६ चैत/अर्थ र व्यापार – नेपाल नागरिक उड्डयन प्राधिकरणले धेरै पटक ताकेता गर्दा पनि अटेरगरि बक्यौता नतिर्ने विभिन्न सातवटा वायुसेवा कम्पनीहरूलाई कालोसूचिमा राखेर कारबाही गर्ने चेतावनी दिएको छ ।
यसअघि विभिन्न समयमा गरि तीन पटकसम्म पत्राचार गर्दा पनि आफुले बुझाउनुपर्ने बक्यौता रकम तिर्न नआएपछि हाल सञ्चालनमा नरहेका विभिन्न वायुसेवाका सञ्चालकहरूलाई कारबाही गर्ने तयारी गरिएको प्राधिकरणले जनाएको छ ।
प्राधिकरणले नेकोन एयर, शिवानी एयर, गोरखा एयर, माउण्टेन एयर, कस्मिक एयर, स्काईलाईन एयरवेज र एयर काष्ठमण्डपलाई कालोसूचीमा राखेर कारबाही गर्ने चेतावनी दिएको छ।
बक्यौता उठाउन ताकेता गरिरहेको प्राधिकरणले हाल हवाई उडान सेवा नै बन्द गरेर बसेका यी वायुसेवा कम्पनीहरूलाई वक्यौता तिर्न ७ असोज २०७७, २६ माघ २०७७ र १२ भदौ २०७८ मा समेत गरी तीनपटकसम्म सार्वजनिक सूचना नै प्रकाशित गरेको थियो ।
प्राधिकरणले आइतबार अन्तिम पटक भन्दै निकालेको सूचनामा ७ दिन भित्र वक्यौता तिर्न आउन भनिएको छ । यदि बक्यौता तिर्न नआए यि वायुसेवा कम्पनीहरुलाई कालोसूचीमा राख्दै भविष्यमा हवाई सेवासम्बन्धी कुनै पनि काम कारबाही गर्न नदिने र सञ्चालकहरूको बैंक खाता रोक्कादेखि राहदानी रोक्कासम्म गरिने चेतावनी दिइएको प्राधिकरणले जनाएको छ ।
प्राधिकरणले नेकोन एयर, शिवानी एयर, गोरखा एयर, माउण्टेन एयर, कस्मिक एयर, स्काईलाइन एयर र एयर काष्ठमण्डप एयरलाई ९ करोड १७ लाख रुपैयाँ बुझाउन यस्तो ७ दिने अल्टिमेटम दिएको हो । प्राधिकरणका अनुसार नेकोन एयरका सञ्चालकहरु दीपमणी राजभण्डारी, मुकुन्दभक्त श्रेष्ठ, दीपकराज कोईराला, रविन्द्र श्रेष्ठ, मृगेन्द्र जोशी र रविचन्द्रमान जोशीले ४ करोड ७२ लाख रुपैयाँ , २५ हजार ३५३ रुपैयाँ बुझाउन बाँकी छ ।
यसैगरि, शिवानी एयरका सञ्चालक मणिन्द्रलाल रञ्जितकारले ५५ लाख ५१ हजार ५३ रुपैयाँ र गोरखा एयरका सञ्चालकहरु प्रज्वल श्रेष्ठ, डा. उज्वल श्रेष्ठ, गिन्नी बाबा श्रेष्ठ, सूर्यप्रसाद श्रेष्ठले २० लाख ३५ हजार २९ रुपैयाँ बुझाउन बाँकी छ ।
त्यसैगरि, माउण्टेन एयरका सञ्चालकहरु प्रज्ञान शमशेर जबरा, सिद्धिका राणा र शिवेन्द्र बहादुर बस्नेतले ६ लाख १० हजार ८३४ रुपैयाँ र कस्मिक एयरका सञ्चालक क्याप्टेन रविन्द्र प्रसाद प्रधानले ३ करोड ४७ लाख ५८ हजार ७० रुपैयाँ बुझाउन बाँकी छ ।
त्यस्तै, स्काइलाईन एयरवेजका सञ्चालकहरु आङछिरिङ शेर्पा, मिङमा दोर्जे शेर्पा, पेम्बा छिरिङ शेर्पा, तेञ्जिङ नोर्बु शेर्पा, यादब खरेल, बिक्रम पाँडे, केदारबहादुर प्रधानाङग, उत्तम कृष्ण खरेलले ७ लाख ८० हजार ४०० रुपैयाँ बुझाउन बाँकी छ ।
त्यसैगरी, एयर काष्ठमण्डपका सञ्चालकहरु प्रज्वल श्रेष्ठ, उज्लव श्रेष्ठ र हमादअली जावोर (कतार)ले गरी ७ लाख ३८ हजार ४४७ रुपैयाँ बुझाउन बाँकी छ ।
अहिलेसम्म अटेरगरि आफुले बुझाउनुपर्ने रकम नतिर्ने वायुसेवा कम्पनीहरुलाई प्राधिकरणले बक्यौता तिर्न नपर्ने हो भने सोही प्रमाण सहितको कागजात लिएर उपस्थित हुन समेत आग्रह गरिएको प्राधिकरणले जनाएको छ ।