१० फागुन/अर्थ र व्यापार– तनहुँको पर्यटकीय नगरी बन्दीपुरमा निर्माणाधीन अवस्थामा रहेको बन्दीपुर केबलकारको टावर जडानको काम सुरु भएको छ । पछिल्लो समय पूर्वाधार निर्माणलाई तीव्रता दिइरहेको बन्दीपुर केबलकार एण्ड टुरिजम लिमिटेडले अहिले धमाधम टावर जडानको काम सुरु गरेको हो ।
बन्दीपुर गाउँपालिका–४ ठुल्ढुङ्गाबाट सुरु हुने यस केबलकार सोही वडाको बरालथोकसम्म पुग्छ । लिमिटेडका अध्यक्ष रामचन्द्र शर्माका अनुसार हालसम्म तीनवटा टावर जडान सम्पन्न भएको छ । यो केबलकार सञ्चालनका लागि कूल ११ वटा टावर जडान गरिनेछ । आगामी तीन महिनाभित्र टावर जडान कार्य सम्पन्न गर्ने लक्ष्य लिएको जानकारि गराउँदै शर्माले भने, ‘अहिले धमाधम काम भइरहेको छ । ’
केबलकार परियोजना अन्तर्गत माथिल्लो स्टेशनमा पाँचतारे होटल पनि निर्माण भइरहेको छ । बीचमा कोभिडका कारण केही काम सुस्ताए पनि अहिले कामले तीव्रता पाएको शर्माले जानकारि दिए । उनका अनुसार तल्लो स्टेशनमा पनि पूर्वाधार निर्माणको काम भइरहेको छ । कोरोना महामारिको प्रभावका कारण परियोजनाको काममा ढिलासुस्ती भयो, कोभिडको जोखिम कम हुँदै गएकाले समग्र कामलाई पनि तीव्रता दिएको उनको भनाई छ ।
हाल यस केवलकार लिमिटेडले होटल र केबलकारको स्तरोन्नति गरेको छ । केबलकार र होटलको क्षमता बढेकाले लगानी पनि वृद्धि भएर २ अर्ब ६० करोड रुपैयाँ पुगेको छ । यसअघि केबलकारको क्षमता प्रतिघण्टा तीनसय रहेकामा त्यसलाई बढाएर पाँचसय पुराईएको छ । यसैगरि, होटलको कोठा संख्या पनि ६६ रहेकामा त्यसलाई बढाएर ८७ पु¥याइएको छ ।
शर्माका अनुसार केबलकारको संरचनाको काम ९५ प्रतिशत सकिएको छ । २०७५ साउन पहिलो साता शिलान्यास भई २०७७ सालको १ फागुनमा केबलकार सञ्चालन गर्ने लक्ष्य लिइएको र कोभिड–१९ को प्रभावका कारण सो लक्ष्य प्रभावित भएको थियो । अब २०७९ सालको १ फागुनमा बटम स्टेशनको सम्पूर्ण काम र केबलकारको सम्पूर्ण काम सकेर व्यावसायिक सेवा सञ्चालन गरिने शर्माले जानकारी दिए ।
यस कम्पनीले २०७९ सालको १ वैशाखदेखि होटल लगायत सम्पूर्ण पूर्वाधार प्याकेज सहित फुलफेजमा पर्यटन पूर्वाधारयुक्त केबलकार परियोजना सञ्चालनमा ल्याउने रणनीति बनाएको थियो । माथिल्लो स्टेशनको बहुआयामिक चारतारे होटल सहितको निर्माण सम्पन्न गरी आगामी २०८० सालको १ असोजमा परियोजना मूल योजना सञ्चालनमा ल्याउने तयारी गरिएको छ । यस कम्पनीले त्यसभन्दा अघि गत १ फागुनमा रेष्ट्रोजोन सञ्चालनमा ल्याउने बताएको थियो । केबलकारभित्र रेष्ट्रोको सुविधा प्रत्येक आकर्षण र हट प्रडक्ट बन्छ, प्रत्येक दिनको अफ आवर साँझ ५ बजेदेखि ९ बजेसम्म यो सेवा दिने तयारीमा आफुहरु रहेको बताउँदै शर्माले भने , ‘ हामीले अपेक्षा गरेको समयमा नै केबलकार सञ्चालनमा ल्याउने छौं । ’
शर्माका अनुसार तल्लो र माथिल्लो स्टेशनमा रेष्टुरेण्ट हुने भएकाले रेष्ट्रो प्याकेजमा सेवा दिन सक्नेछ । यहाँ ल्याण्डस्क्यापिङ र कृत्रिम झरना पनि बनाइनेछ । बन्दीपुरको ऐतिहासिकता झल्कने गरी बन्दीपुर घडी बन्दीपुर गार्डेन बनाउने लक्ष्य लिइएको छ । यस गार्डेनभित्र बटम स्टेशनको पाँच तला माथिबाट पानीको आकर्षक झरना बनाइनेछ । यसले पर्यटकलाई लोभाउने विश्वास गरिएको शर्माले बताए । यसैगरी, वाटरपार्क, म्युजिकल वाटर शो बनाउने लक्ष्य यस कम्पनीको छ ।
बन्दीपुर गाउँपालिका–४ ठूल्ढुङ्गास्वाँराबाट बरालथोकसम्म जोडिने केवलकारबाट एसियाकै ठूलो दाबी गरिएको विमलनगरस्थित सिद्धगुफा पनि अवलोकन गर्न सकिने सो कम्पनीले जनाएको छ । ठूल्ढुङ्गास्वाँराबाट सुरू हुने केबलकार सिद्धगुफाको छेउ हुँदै बन्दीपुरको उचाइसम्म पुग्नेछ । यस केवलकारको लम्बाई एक किलोमिटर ६०० मिटरको हुने छ ।
आरकेडी रियलस्टेट एण्ड कन्स्ट्रक्शन प्रालि, पन्चासे केबलकार एण्ड टुर्स प्रालि, टुरिजम इन्भेष्टमेन्ट फण्ड लिमिटेड, बन्दीपुर गाउँपालिका र स्थानीयवासीको लगानीमा यस केवलकार परियोजना निर्माणको कामलाई अघि बढाइएको हो । यो केबलकार सञ्चालनकालागि मुख्य लगानीदाता कम्पनी नेपाल र विदेशमा बस्ने नेपालीहरूको कम्पनी नै हो, यहाँ एकहजार १०० भन्दा बढी लगानीकर्ता रहेका छन् ।