२८ असार / अर्थ र व्यापार – सेयरबजार परिसूचक नेप्से बढेको छ । बुधबारको कारोबारमा नेप्से अढाई अंक बढीले उकालो लागेपनि कारोबार रकममा भने गिरावट आएको छ । अघिल्लो दिनको तुलनामा कारोबार रकम ३५ करोडले कम हो ।बुधबार नेप्से २.५५ अंकले बढेर १५८७.५६ विन्दुमा पुगेको छ । कारोबारमा आएका अधिकांस समूहमा गिरावट आएपनि वाणिज्य बैंक, विकास बैंक र बीमा समूह सकारात्मक रहेपछि बजार सामान्य बढेको हो ।

यसदिन वाणिज्य बैंक समूह ३.५९, विकास बैंक ७.२९ तथा बीमा २७.७१ अंकले बढेका छन । होटल,जलविद्युत, वित्त र अन्य समूह भने नकारात्मक रहेका छन ।

१५२ कम्पनीको कारोबार भएको बजारमा ३५ लाख ९७ हजार कित्ता सेयर ६४ करोड २ लाख रुपैयाँ बराबरमा किनबेच भए ।  मंगलबार झण्डै एक अर्ब बराबरको कारोबार भएको थियो । मंगलबारको बजारमा नबिल बैंक र नेशनल लाईफको संस्थापक सेयरको खरिद बिक्री उच्च हुँदा कारोबार रकम उकासिएको थियो । 

बुधबारको बजारमा सोल्टी होटलको सबैभन्दा धेरै ७ करोड ६३ लाख बराबरको सेयर किनबेच भएको छ । मुक्तिनाथ विकास बैंकको संस्थापक सेयर पनि ३ करोड ७२ लाख बराबरको कारोबार भयो । नेपाल लाइफ र एनसीसी बैंक पनि उच्च कारोबार गर्ने कम्पनीको सूचिमा रहेका छन ।

बजार झिनो अंकले बढेपनि चार कम्पनीको सेयरमूल्य दश प्रतिशतकै हाराहारीमा बढेको छ । फरवार्ड माइक्रो,अरुण फाइनान्स, कर्णाली डेभलपमेन्ट र कुबेर मर्चेन्टको सेयरमूल्य दश प्रतिशतकै हाराहारीमा बढेको छ । 

सिनर्जी फाइनान्स र नागरिक लगानीकोषको सबैभन्दा बढी चार प्रतिशतले सेयरमूल्य ओरालो लागेको छ । नागरिक लगानीकोषले अघिल्लो बर्षको कमाईबाट २१.८५ प्रतिशत बोनस वितरण गर्ने प्रस्ताव गरेको थियो । कोषको प्रस्तावलाई लगानीकर्ताले खासै रुचाएको देखिएन । धितोपत्र बोर्डको कारबाही भोगेर आजै कारोबार खुलेको नेशनल हाइड्रोको सेयरमूल्य घटेको छ ।