स्टक ब्रोकर एसोसिएसनद्वारा अर्थमन्त्री समक्ष ६ बुँदे माग

824 पटक पढिएको

२३ चैत/अर्थ र व्यापार- स्टक ब्रोकर एसोसिएसन अफ नेपालले शेयर बजारमा देखिएका विद्यमान समस्या समाधानका लागि अर्थमन्त्री स्वर्णिम वाग्ले समक्ष ६ बुँदे माग पत्र बुझाएको छ । सोमबार एसोसिएसनका प्रतिनिधिहरूले अर्थ मन्त्रालय पुगेर पूँजीबजारको विकास र विस्तारका लागि तत्काल चाल्नुपर्ने कदमहरूका बारेमा आफ्नो माग पेश गरेका हुन । एसोसिएसनले हाल पूँजीबजारमा ७६ लाखभन्दा बढी लगानीकर्ता र ९२ वटा ब्रोकरहरू रहेको तथ्यांक प्रस्तुत गर्दै नयाँ सरकार र अर्थमन्त्रीबाट बजारले ठुलो आशा राखेको उल्लेख गरेको छ ।

ब्रोकरहरूले बुझाएको मागमा पूँजीबजार सुधारका लागि विभिन्न समयमा गठित कार्यदलले दिएका तर कार्यान्वयन हुन बाँकी रहेका सुझावहरू तत्काल लागू गरिनुपर्ने, बैंक तथा वित्तीय संस्थाहरूलाई पूँजीबजारमा सहज रूपमा प्रवेश र बाहिरिन सक्ने व्यवस्था गर्नुपर्ने र हाल रहेको शेयर खरिद गरेपछि ६ महिनासम्म बिक्री गर्न नपाइने व्यवस्था हटाउनुपर्ने उल्लेख छ ।

त्यस्तै गैर आवासीय नेपालीहरूलाई दोस्रो बजारमा सहज रूपमा शेयर कारोबार गर्न पाउने व्यवस्था तत्काल मिलाउनुपर्ने, बजेटमार्फत पूँजीगत लाभकरलाई नै अन्तिम कर हुने गरी स्पष्ट पार्नुपर्ने साथै, सरकारी संस्थान र विभिन्न कोषहरूको रकमलाई दोस्रो बजारमा लगानी गर्ने वातावरण बनाई लगानीकर्ताको मनोबल बढाउनुपर्ने उल्लेख छ । त्यस्तै हाल शेयर हस्तान्तरण हुन नसक्दा सिधै ’क्लोज आउट’मा गएर लगानीकर्ताले जरिवाना तिर्नुपर्ने अवस्था छ । यसलाई अन्त्य गर्न र बजारलाई थप सुरक्षित बनाउन ’अक्सन मार्केट’ यथाशीघ्र सञ्चालनमा ल्याउनुपर्ने र हालसम्म कार्यान्वयनमा नआएको सेटलमेन्ट ग्यारेन्टी फण्ड लाई नियामक निकायमार्फत निर्देशन दिएर तत्काल कार्यान्वयनमा ल्याउनुपर्ने एशोसियसनको माग छ ।

तपाईको प्रतिक्रिया

सम्बन्धित शीर्षकहरु

क्रिस्टल कञ्चनजंघाले सुरू गर्याे मार्जिन ट्रेडिङ सुविधा, ७० प्रतिशतसम्म ऋण दिने

स्टक ब्रोकर एसोसिएसनले दियो अध्यक्ष भट्टलाई बधाई, पुँजीबजारको विकासका लागि पहल गर्ने प्रतिबद्धता

नेप्से २६.१६ अंकले घटेर २६७४ विन्दु भन्दा तल