२५ फागुन/अर्थ र व्यापार – सेयर बजारमा लगातार तीन सकारात्मक सर्किट ब्रेक लागेसँगै सोमबारका लागि कारोबार स्थगित भएको छ ।
यसदिन नेप्से परिसूचक १ सय ६२ अंकले बढेर २८ सय ७५ विन्दुमा पुगेको छ । कुल ५५ करोड ५९ लाख रुपैयाँ बराबरको कारोबार भएको छ ।
प्रतिनिधिसभा सदस्य निर्वाचनपछि प्राप्त मतपरिणामबाट राष्ट्रिय स्वतन्त्र पार्टीले झन्डै दुई तिहाई नजिक बहुमत ल्याएपछि सेयर लगानीकर्ताको विश्वास बढेको र सोमबार सेयर बजारमा लगातार ३ पटकसम्म सकारात्मक सर्किट ब्रेक लागेको हो ।
सोमबार सेयर बजारमा लगातार तीन सकारात्मक सर्किट ब्रेक लागेसँगै सोमबारका लागि कारोबार स्थगित भएको नेपाल स्टक एक्सचेन्ज लिमिटेडले जनाएको छ ।
यसदिन बजार कुल ६ प्रतिशतले बढेसँगै तेस्रो सर्किट ब्रेक लागेर कारोबार स्थगित भएको थियो ।
यस दिनको कारोबारपछि नेप्से परिसूचक १ सय ६२ अंक अर्थात ६ प्रतिशतले बढेको छ । सो वृद्धिसँगै नेप्सेपरिसूचक २८ सय ७५ मा पुगेको छ भने ५५ करोड ५९ लाख रुपैयाँ बराबरको कारोबार भएको छ ।
यस निर्वाचनपछि देशभरको मतपरिणाम आउने क्रम जारी छ । हालसम्मको परिणामअनुसार राष्ट्रिय स्वतन्त्र पार्टी दुई तिहाई नजिक पुगेको छ । जसले लगानीकर्ताको विश्वास बढ्न गई बजारमा प्रभाव देखिएको छ ।
कारोबार खुलेको एक मिनेटमै पहिलो सर्किट ब्रेक लागेको थियो । २० मिनेट स्थगितपछि खुलेको बजारमा फेरि अर्को एक मिनेटमै दोस्रो सर्किट ब्रेक लागेको थियो । त्यसपछि ४० मिनेट स्थगित भइ खुलेको बजारमा अर्को एक मिनेट नपुग्दै सर्किट ब्रेक लागेपछि सोमबारका लागि कारोबार नै स्थगित भएको थियो ।
यसदिन २ सय ५२ वटा कम्पनीको मूल्य बढेको छ भने एउटा कम्पनी रिलायन्स स्पिनिङ मिल्सको घटेको छ । यसदिन बैंकिङ उपसमूहतर्फ ६ दशमलव ९२ प्रतिशत, विकास बैंक उपसमूहतर्फ ५ दशमलब ९१ प्रतिशत, फाइनान्स उपसमूहतर्फ ५ दशमलब ४७ प्रतिशत, होटल तथा पर्यटन उपसमूहतर्फ ५ दशमलव ७३ प्रतिशत, हाइड्रोपावर उपसमूहतर्फ ६ दशमलब ८१ प्रतिशतले बढेको छ ।
लगानी उपसमूहतर्फ ७ दशमलब ०६ प्रतिशत, जीवन बीमा उपसमूहतर्फ ४ दशमलब ६७ प्रतिशत , उत्पादन तथा प्रशोधन उपसमूहतर्फ ५ दशमलव ३० प्रतिशत , माइक्रोफाइनानस उपसमूहतर्फ ४ दशमलव शून्य ७ प्रतिशत, निर्जीवन बीमा उपसमूहतर्फ ३ दशमलन ७४ प्रतिशत, अन्य उपसमूहतर्फ ५ दशमलव ५६ प्रतिशत तथा व्यापार उपसमूहतर्फ ७ दशमलव ७३ प्रतिशतले बढेका छन् ।
एक दर्जन कम्पनीको सेयरमूल्य १० प्रतिशतले बढेको छ । कर्पोरेट डेभलपमेन्ट बैंक, शिवश्री हाइड्रोपावर, हिमालयन रिइन्स्योरेन्स, सिटी होटल, निफ्रा, नेपाल बैंक, बलेफी हाइड्रोपावर, माथिल्लो तामाकोशी, शुभम् पावर, नेपाल इन्भेस्टमेन्ट मेगा बैंक, हिमस्टार ऊर्जा र हिमाल दोलखा हाइड्रोपावरको सेयर मूल्य १० प्रतिशतले बढेको छ ।
रिलायन्स स्पिनिङ मिल्सको मूल्य १ दशमलव ४९ प्रतिशत घट्यो । यसदिन धेरै कारोबार भएका कम्पनीमा नारायणी डेभलपमेन्ट, शिवम् सिमेन्ट, एसवाई प्यानल, ङादी ग्रुप र राधि विद्युत् क्रमशः अगाडि रहेको छ ।