१० साउन / अर्थ र व्यापार – बीमा क्षेत्रले उचाल्दा सेयर बजार घट्नबाट जोगिएको छ । मंगलबार सबैभन्दा बढी राष्ट्रिय बीमा कम्पनीको १० करोड २९ लाख रुपैयाँ बराबरको प्रमोटर सेयर बिक्री भएको छ । सो दिन यस कम्पनीको प्रमोटर सेयर प्रतिकित्ता १५३६ रुपैयाँमा कारोबार भएको छ । जुन अघिल्लो दिनको तुलनामा १० प्रतिशत बढी हो ।

त्यस्तै, यस कम्पनीको पब्लिक सेयर प्रतिकित्ता १६,२६९ देखि १७,५४५ रुपैयाँसम्ममा किनबेच भएको छ । बजार बन्द हुँदा कम्पनीको पब्लिक सेयर प्रतिकित्ता १७५४५ रुपैयाँ रहेको छ । जुन रकम अघिल्लो दिनको तुलनामा १५९५ रुपैयाँले बढी हो ।

मंगलबारको सेयर बजारमा ९४ करोड ९५ लाख रुपैयाँ बराबरको सेयर कारोबार भएको छ । सो दिन १५६ कम्पनीको १३ लाख ७१ हजार कित्ता सेयर किनबेच भएको छ । समग्रमा नेप्से परिसूचक ७ दशमलब ११ अंकले बढेर १६३६ अंकमा पुगेको छ ।

त्यस्तै, बजारमा सबैभन्दा बढी बीमा समूहको परिसूचक १५७ अंकले उकालो लागेको छ । त्यस्तै, उत्पादनमूलक र हाइड्रोपावर समूहको परिसूचक क्रमशः ७९ र १८ अंकले बढेका छन् । उता बैंकिङ र अन्य समूहको परिसूचक भने सामान्य अंकले ओरालो लागेका छन् ।

बैकिङ र अन्य सुचकमा गिरावट आउँदा पनि शेयर बजार बढेको हो । बैंकिङ उपसुचक ०.४ र अन्य ३.१८ अंकले घटेको छ । व्यापार समूह १.३५, होटल ८.३९, विकास बैंक ६.४८, जलबिद्युत १८.०३, फाइनान्स ६.९६ उत्पादनमुलक ७९.८५ अंकले बढेको छ ।

आज राष्ट्रिय बीमा कम्पनीका शेयर धनीले सबैभन्दा बढी १० प्रतिशत कमाएका छन् । चार प्रतिशत सिनर्जी पावर डेभलपमेन्ट कम्पनीका सेयरधनीले गुमाएका छन् ।