२२ असार / अर्थ र व्यापार – साउन महिना नजिकिँदै  गर्दा सेयरबजारमा हरियाली छाएको छ । साताको अन्तिम दिनको कारोबारमा सेयरबजार ३१ अंकले उकालो लागको छ भने अघिल्लो दिनको तुलनामा कारोबार रकम पनि ५८ प्रतिशतले बढेकोे छ ।

बिहीबार नेप्से ३१.०५ अंकले बढेर १५८२.११ अंकमा पुगेको छ । कारोबार खुलेदेखि नै निरन्तर उकालो लागेको नेप्से दुई प्रतिशतले बढेको हो । कुल १४८ कम्पनीको कारोबार भएको बजारमा ७६ करोड ३० लाख रुपैयाँ बराबरको सेयर किनबेच भयो । बुधबारको तुलनामा कारोबार रकम २८ करोडले बढी हो । बुधबारको कारोबारको तुलनामा विहीबार कारोबार रकम ५८ प्रतिशतले बढेको छ । 

चुनाबी खर्च र आर्थिक बर्ष सकिनै लाग्दा सरकारी खर्च समेत बढ्न थाल्दा वित्तीय प्रणालीमा तरलताको अवस्था सहज हुँदा यसको प्रभाव सेयर बजारमा देखिएको छ । असार मसान्त सकिदै गर्दा बैंक तथा वित्तीय संस्थाहरुका ऋणीहरुले साँवा तथा कर्जाको ब्याज तिर्ने रकम जोहो गरिसकेकाले पनि सेयर कारोबार बढोत्तरी आएको हो ।

अर्कातर्फ नयाँ आर्थिक बर्षका लागि आउने मौद्रिक नीतिप्रति लगानीकर्ताको सकारात्मक अपेक्षासँगै सूचिकृत कम्पनीले चौथो त्रैमासमा उच्च नाफा सहितको आर्थिक प्रतिवेदन प्रस्तुत गर्ने आँकलनले पनि लगानीकर्ताले सेयर खरिद बढाएको देखिएको छ । अर्कातर्फ केही साता यताबाट निरन्तर घटेको बजारमा राम्रा कम्पनीको सेयरहरु सस्तो मूल्यमा उठाएकाले पनि बजारमा उच्च वृद्धि आएको हो ।

त्यस्तै मल्टिबैकिङ क्लियरिङ सेटलमेन्टको सुरुवात र स्वचालित अनलाइन प्रणाली भदौबाटै परिक्षणमा आउने बिषयले पनि लगानीकर्ताकताको मनोबल बढ्न गएको देखिन्छ । 

विहीबार कारोबारमा आएकामध्ये सबै समूहमा हरियाली छाएको छ । यसदिन सबैभन्दा बढी बीमा समूहको सूचक ३१९ अंकले बढेको छ । वाणिज्य बैंक २४.५३, विकास बैंक ३९.४५, जलविद्युत २०.७४, वित्त ४.९२, उत्पादन ११.२४ र अन्य समूह ४.३४ अंकले उकालो लागेका छन ।

यसदिन नेरुडे लघुवित्तको सबैभन्दा बढी ६ करोड २० लाख बढीको सेयर कारोबार भएको छ । नेपाल लाइफको ५ करोड ४९ लाख तथा सानिमा बैंकको ४ करोड ४६ लाख रुपैयाँ बराबरको कारोबार भयो ।

साताको अन्तिम दिनको सेयर कारोबारमा अरुण भ्याली हाइड्रोको सेयरमूल्य सबैभन्दा धेरै सात प्रतिशतले बढेका छ । यस्तै निर्धन उत्थान,नेपाल लाइफ, रिलायबल वित्तीय संस्था, सूर्य लाइफ लगायतका कम्पनीको सेयरमूल्य बढेको छ ।

 ३१.०५ अंकले बढेको बजारमा प्रोगेशिभ फाइनान्सका लगानीकर्ताले सबैभन्दा धेरै आठ प्रतिशतका दरले गुमाए । वल्र्ड मर्चेन्ट फाइनान्स, गुडविल फाइनान्स तथा जेबिल्स फाइनान्स लगायतका कम्पनीको सेयरमूल्य ओरालो लागेको छ ।