२२ भदौ / अर्थ र व्यापार – बुधबार दोहोरो अंकले उक्लिएको शेयर बजारको बृद्धि एक दिन पनि टिक्न सकेन् । कारोबारमा आएका सबै उपसूचकमा गिरावट आउँदा बिहीबार बजार घटेको हो । साताको अन्तिम दिन बिहीबार ११.९५ अंकले घटेर नेपाल स्टक एक्सचेन्जको कारोबार मापक सूचक १५५४.५५ अंकमा झरेको छ । बुधबार सूचक ११.९४ अंकले बढेर १५६६.५० अंकमा पुगेको थियो । बुधबार बजार खुल्दाकै अवस्थामा बिहीबार बजार बन्द भएको हो ।

मुख्य सूचकलाई पछ्याउँदै क बर्गका कम्पनीहरुको कारोबार मापन गर्ने सेन्सेटिभ इनेक्स २.२० अंकले घटेर ३२६.०१ अंकमा ओर्लिएको छ । बुधबार यो सूचक २.७२ अंकले बढेर ३२८.२१ अंकमा पुगेको थियो । बिहीबार कारोबारको सुरुवाती एक घण्टा करिब चार अंकले बढेको बजार त्यसपछी भने निरन्तर घटेर बन्द भएको हो ।   

बजारमा तरलता समस्या हट्दै गएको र ब्याजदर खुकुलो बन्दै गएपनि खासै टेवा पाउन सकेन । बिहिबार १५७ कम्पनीका १२ लाख ८५ हजार कित्ता शेयर ७३ करोड  ४९ लाख रुपैयाँमा खरिद बिक्रि भए । बुधबारको तुलनामा १० करोड रुपैयाँले कारोबार रकम घटेको हो ।

बिहिबार नबिल बैंकले करिब पाँच करोड रुपैयाँ बराबरको शेयर खरिद बिक्री भएको छ । बैंकको बोनस शेयर सुरक्षित गर्ने बुक क्लोज मिति नजिकिदै गर्दा लगानिकर्ताले शेयर खरिद बिक्रीमा चाप बढाएका हुन ।

साताको अन्तिम कारोबार दिन बैंक ९.२४, होटल ११.१५, विकास बैंक ५.५, जलबिद्युत २३.७४, फाइनान्स ५.४७, बीमा ११४.८६, उत्पादनमुलक २४.१३ र अन्य ४.०५ अंकले घटेको छ । सबैभन्दा बढी सिन्धु विकास बैंकका शेयरधनीले करिब आठ प्रतिशत कमाएका छन् । एक्सेल डेभलपमेन्ट बैंकको शेयर करिब ६ प्रतिशतले घटेको छ ।