१९ कात्तिक / अर्थ र व्यापार
   
शेयर बजारप्रति लगानीकर्ताको सेन्टिमेन्ट सकारात्मक हुन नसक्दा शेयर बजार घट्ने क्रम रोकिन सकेको छैन । सूचकमा सामान्य उतारचढाव बाहेक कुनै पनि उत्साह नहुँदा लगानीकर्ताको सहभागिता दिनदिनै घट्दै गएको ब्रोकरहरु बताउँछन्।

बजार सुधार हुने बलियो कारण देखा नपर्दा साना तथा ठूला लगानीकर्ताहरु पर्ख र हेरको अवस्थामा छन् ।बजार सुधार नहुँदा दैनिक २० करोड रुपैयाँ हाराहारीमै घुमिरहेको छ । अझै धेरै कम्पनीहरुले लाभांशको बुक क्लोज गर्न बाँकी छ।

राम्रो लाभांश दिने कम्पनीको शेयर समेत सुधार हुन सकेको छैन । प्राय लगानीकर्ता र ब्रोकरहरुले अर्थमन्त्रीलाई बजार सुधार हुन नसक्नुको कारक मानेपनि उनले पछिल्लो समय बजार तल माथि हुने गरी कुनै पनि अभिव्यक्ति र गतिविधि गरेका छैनन् ।

साल्ट ट्रेडिङको शेयर मात्रै २ करोड ६३ लाख रुपैयाँको कारोबार भएको छ । आकर्षक लाभांश घोषणा गरेका एभरेष्ट र नविल बैंकको कारोबार अधिकतमको सूचीमा पर्ने क्रमले निरन्तरता पाएको छ।

बैंकिङ, उत्पादन तथा प्रशोधन, माइक्रोफाइनान्स र म्युचुअल फण्डको सूचकमा सामान्य सुधार देखिएको छ । नेप्से सूचक ०.८१ विन्दुले घटेर ११३९.४५ विन्दुमा रोकिएको छ । ग्लोबल आइएमई समुन्नत स्किमको सकारात्क सर्किट लागेर ७.८ रुपैयाँ पुगेको छ ।