४ भदौ / अर्थ र व्यापार – नेप्से परिसूचक साताको पहिलो दिन दोहोरो अंकमा घटेको छ । ११. ७८ अंकले घटेर नेप्से १६१७ अंकमा कायम भएको छ । १५९ कम्पनीको ७९ करोड ४६ लाखको सेयर खरिदबिक्री भएको छ । होटलबाहेकका सबै समूह रातो अंकमा रहे । सो समूह ४ अंकले बढेको छ । बैंकिङ १२ , विकास बैंक १४, जलविद्युत १५, बिमा ३९, उत्पादन २५ र अन्य समूह २ अंकले अंोर्लिए ।

प्राइम लाइफ इन्स्योरेन्सको सबैभन्दा धेरै रकमको कारोबार भयो । सो कम्पनीको ५ करोड ४३ लाखको कारोबार हुँदा मूल्य पनि बढेर प्रतिकित्ता २७७४ कायम भएको छ  । सिद्धार्थ इन्भेष्टमेन्ट ग्रोथ स्किमको ४ करोड ४४ लाखको कारोबार भयो । ६० प्रतिशत लाभांशका लागि कम्पनीको बुक क्लोज मिति भदौ १२ रहेकाले उसको कारोबार बढेको हो । कम्पनीले आजै लाभांशको घोषणा गरेको हो । एनसीसी बैंक, नेपाल बैंक तथा साना किसान बैंकपनि कारोबारका आधारमा अगाडि रहे।

बजार घटे पनि स्वरोजगार लघुवित्त विकास बैंकका लगानीकर्ताले १० प्रतिशतको हाराहारीमा नाफा कमाएका छन् । सिर्जना फाइनान्स र लक्ष्मी बैंकको मूल्य क्रमशः ७ र ५ प्रतिशतले बढेको छ । हिमालयन डिस्टिलरीका लगानीकर्ताले आज पनि १० प्रतिशत मूल्य गुमाए । वर्ल्ड मर्चेन्ट बैंकिङको मूल्य ९ प्रतिशतले घटेको छ । रिडी हाइड्रो, ग्रीन डेभलपमेन्टको मूल्य क्रमशः ७ र ५ प्रतिशतले घट्यो । समूहगत रुपमा हेर्दा बैंकिङ समूहको सबैभन्दा धेरै २० करोड ९० लाखको कारोबार भएको छ ।

आजदेखि हिमालयन पावरको कारोबार भएको छ । ३ सय रुपैयाँमा कारोबार खुले पनि बन्द हुँदा प्रतिकित्ता ३३० पुगेको छ ।