२६ भदौ / अर्थ र व्यापार – साताको पहिलो दिन आइतबारको सेयरबजार २.२४ प्रतिशतले घटेको छ । नेप्सेमा सूचिकृत कम्पनीहरुले धमाधम लाभांश घोषणा गरेर साधारणसभा आह्वान गरि रहँदा बजारमा झन ठूलो पहिरो चलेको छ । तर कतिपय लगानीकर्ताले बजार घटेकै मौकामा सेयर खरिदको क्रम बढाउँदा कारोबार रकम भने उत्साहजनक देखिएको छ ।

आइतबारसम्म सेयरबजारमा सूचिकृत करिब तीन दर्जन कम्पनीले लाभांश घोषणा गरिसकेका छन भने आधा दर्जन बढीले साधारणसभा नै बोलाई सकेका छन् । तर यहि अवस्थामा सेयरबजारमा भने सेयर बिक्रीको चाप अधिक परेको छ । जसका कारण कम्पनीहरुको सेयरमूल्य घट्दा समग्र बजार उच्च अंकले घट्न पुग्यो । 

आइतबार नेप्से ३४.८९ अंकले घटेर १५१९.६६ अंकमा पुगेको छ । यसदिन १५८ कम्पनीको ९२ करोड ४२ लाख बराबरको कारोबार भयो । कारोबार रकम गत विहीबारको तुलनामा १९ करोड बढी हो । कारोबारमा आएका सबै समूहका सूचक घटेपछि बजार राताम्मे भएको छ । कुल १५ लाख ५७ हजार ३८३ कित्ता सेयर किनबेच भएका छन् ।

बजार झरेपनि १२ कम्पनीको सेयर मूल्य भने बढेको छ । समता, निर्धनजस्ता संस्थाको सेयर मूल्य झरेको हो । १० प्रतिशतले छिमेक लघुवित्तको सेयर मूल्य झरेको छ । जेनरल फाइनान्सको ८ प्रतिशत र हाम्रो विकास बैंकको करिव ८ प्रतिशतले सेयर मूल्य झरेको छ । 

यसदिन निर्धन उत्थान विकास बैंकको दश करोड ६७ लाख बराबरको कारोबार भयो । ६७ प्रतिशत बोनस घोषणा गरेपछि बैंकको कारोबार उच्च भएको हो । जसको सेयरमूल्य समेत चार प्रतिशतले बढेको छ । समता माइक्रोफाइनान्सका लगानीकर्ताले सबैभन्दा धेरै झण्डै पाँच प्रतिशतले कमाए । छिमेक लघुवित्तका लगानीकर्ताले सबैभन्दा धेरै दश प्रतिशतले गुमाएका छन् ।