२९ साउन / अर्थ र व्यापार – साताको पहिलो दिनको सेयरबजारमा दोहोरो अंकको गिरावट आएको छ भने कारोबार रकममा समेत कमी आएको छ । वित्त र उत्पादन समूह बाहेक सबै समूहका सूचक नकारात्मक रहेपछि सेयरबजार ओरालो लागेको हो । आइतबार नेप्से ११.४० अंकले घटेर १६४२.१३ अंकमा झरेको छ । १६० कम्पनीको कारोबार भएको बजारमा ८० करोड १८ लाख बराबरको सेयर किनबेच भयो । विहीबारको तुलनामा कारोबार रकम १२ करोड कम हो ।

विगत तीन चार दिन यताको अविरल बर्षाका कारण तराईक्षेत्रका अधिकांस स्थानहरु डुबानमा परेको र पहाडी क्षेत्रका केही ठाउँहरुमा आएको पहिरोको प्रभाव समेत सेयरबजारमा देखिएको छ । विरगन्ज, इटहरी तथा विराटनगर लगायतका ब्रोकर शाखाहरुमा बाढीका कारण ईन्टरनेटमा आएको समस्याले सेयर कारोबार हुन सकेन जसले गर्दा सेयर कारोबारमा गिरावट देखिएको हो । वेभसर्फरमा आएको समस्याका कारण ति क्षेत्रमा सेयर कारोबार हुन नसकेको ब्रोकरहरुले जानकारी दिएका छन् ।

यसदिन नेशनल हाइड्रोको सबैभन्दा धेरै ६ करोड ३८ लाख बराबरको सेयर किनबेच भयो । कम्पनीले साउन ३१ बोलाएको साधारणसभा हुने निश्चित भएपछि कारोबार रकम बढेको हो । पाटन उच्च अदालतले कम्पनीको साधारणसभा रोक्न परेको रीट खारेज गर्दे तोकिएको दिनमा सधारणसभा राख्न आदेश दिएपछि कम्पनीको कारोबार बढेको हो । साधारणसभामा कम्पनीको नयाँ व्यवस्थापन भित्राउने एजेण्डा लगिदैछ ।

यसदिन महालक्ष्मी विकास बैंकको सबैभन्दा धेरै झण्डै दश प्रतिशतले सेयरमूल्य बढेको छ । यति डेभलपेमन्टलाई गाभेको महालक्ष्मीको आजैबाट नेप्सेमा सेयर कारोबार खुलेको हो । अरुण फाइनान्स, नेशनल हाइड्रो लगायतको सेयरमूल्य बढेको छ । ललितपुर फाइनान्सको सेयरमूल्य दश प्रतिशतले घटेको छ । ग्रिन डेभलपमेन्ट बैंक र हाम्रो विकास बैंकको सेयरमूल्य पनि दश प्रतिशतकै हाराहारीमा घटेको छ ।