२५ आषाढ/अर्थ र व्यापार– गत सोमबारदेखि शेयर बजारलाई सहयोग पुग्ने गरी मौद्रिक नीति ल्याउने तयारी गरेको भन्दै एक सातामा ४५ अंकले बढेको शेयर बजार हिजो र आज एकाएक घटेको छ । 

नेपाल सरकारले नेपाल स्टक एक्सचेन्जका प्रमुख कार्यकारी अधिकृत चन्द्रसिंह साउदलाई हटाएर अर्थ उपसचिव रमेश अर्याललाई स्टक एक्सचेन्जमा नियूक्ती गरेपछि सोमवार शेयर वजार १७.९६ अंकले घटेको हो ।   

खुला प्रतिस्पर्धाबाट नियुक्त भएका निवर्तमान सिइओ चन्द्रसिंह साउद लगानीकर्ताप्रति केही उत्तरदायी देखिने क्रममै हटाएर अर्थमन्त्रीले आफ्नो प्रतिनिधि पठाउँदा लगानीकर्ता आत्तिएको बजार विश्लेषकहरुले बताएका छन् ।

सोमबार शेयर बजार सूचक १.४७ प्रतिशतले तल झरेपनि कारोबार रकम भने ४१ करोड ८ लाख रुपैयाँको भएको छ।व्यापार र उत्पादन तथा प्रशोधनको उपसूचक उकालो लागेपनि अन्य सम्पूर्ण सूचक तथा उपसूचक घटेका छन् ।

सोमबार लगानीकर्ताले आत्तिएर शेयर बेच्दा सूचक धेरै नै ओरालो लाग्दा पनि कारोबार रकम भने केही बढेको छ । 

आज सबैभन्दा धेरै एभरेष्ट इन्स्योरेन्स कम्पनीको १४ करोड ८० लाख रुपैयाँको कारोबार भएको छ। कन्काइ विकास बैंकका शेयरधनीले सबै भन्दा धेरै ४.६९ प्रतिशतले कमाएका छन् भने साइन रेसुङ्गा डेभलपमेन्ट बैंकका शेयरधनीले ६.६६ प्रतिशतले गुमाएका छन् ।