१७ मंसिर / अर्थ र व्यापार- सोमवार सेयर वजार झिनो अंकले हरियो देखिएको छ । सेयर वजार सुचक ०.९० अंकले बढेर ११३१.७३ अंकमा बन्द भएको छ । सोमवार १५६ कम्पनीका २१ लाख कित्ता शेयर ६३ करोड ७९ लाख रुपैयाँमा कारोबार भएको छ । कुल कारोबारमा नेपाल बैंकको हिस्सा करिव ५० प्रतिशत छ । नेपाल बैंकको मात्र ३२ करोड रुपैयाँको शेयर किनबेच भएको छ ।
नेपाल बैंकका कारण कारोबार रकम उच्च भएपनि शेयर बजारमा सुधारको संकेत भने देखिएको छैन । पहिलो एक घण्टा सूचक सामान्य देखिएको थियो । एक घण्टापछि तीव्र गतिमा बढेको बजारले ११४३ अंकसम्म छोएको थियो । करिब पौने एक घण्टा बढेको बजार त्यसपछि भने बिस्तरै घट्न थालेको थियो । कारोबारको अन्तिम पाँच मिनेट रातो भएको बजारले अन्तिम समयमा झिनो अंकको वृद्धि कायम गरेको हो ।
बजार बढ्न थालेपछि बिक्री गर्नेहरु ह्वात्तै निस्किएका थिए । बजारमा शेयरको आपुर्ति बढेपछि सुचक फेरि ओरालो लागेको थियो । उपसूचक मिश्रित देखिएका छन् । ११ समूहको कारोबारमा सात उपसूचक घटेका छन् भने चार बढेका छन् । सबैभन्दा बढी लघुबित्तको ०.६५ प्रतिशतले घट्यो भने निर्जीवन बिमा समूह १.८४ प्रतिशतले बढेको छ ।
आज विजय लघुबित्तका शेयरधनीले करिब सात प्रतिशत कमाए । रैराङ् हाइड्रो पावरका शेयरधनीले करिब ६ प्रतिशत गुमाए ।
तपाईको प्रतिक्रिया