२४ साउन/अर्थ र व्यापार– साताको पहिलो दिन देखिनै घट्न थालेको शेयर बजार कारोबारको अन्तिम दिन बिहीबार पनि घटेरै बन्द भएको छ ।

नेपाल स्टक एक्सचेन्जको कारोबार मापक सूचक ६.६९ अंकले घटेर ११८०.६३ अंकमा झरेको छ । क वर्गका कम्पनीहरूको कारोबार मापन गर्ने सेन्सेटिभ इन्डेक्स १.३७ अंकले घटेर २४९.१३ अंकमा झरेको छ ।

कारोबारको पहिलो आधा घण्टामा एक अंकको सुधार देखिएपनि त्यसपछि लगातार वजार घटेको हो । 
बिहीबार १६३ कम्पनीका आठ लाख ६९ हजार कित्ता शेयर १९ करोड ६९ लाख रुपैयाँमा खरिद बिक्री भयो । सबैभन्दा बढी नेपाल लाइफ इन्स्योरेन्स कम्पनीको दुई करोड १९ लाख रुपैयाँ बराबरको कारोबार भयो ।

ट्रेडिङ् बाहेक सबै उप सूचक घटेका छन्। ट्रेडिङ् २.११ अंकले  बढेको छ। बैंक ३.३७, होटेल ३१.५२, विकास बैंक १.३१, जलविद्युत १६.८८, फाइनान्स ०.७, निर्जीवन बीमा ७०.७, अन्य ०.४२, लघुबित्त १६.४७ र जीवन बीमा १०२.८३ अंकले घटेको छ।

आरम्भ माइक्रो फाइनान्सका शेयरधनीले करिब चार प्रतिशत कमाए भने मल्टिपर्पोज फाइनान्सका शेयरधनीले करिब १० प्रतिशत गुमाए ।