१५ असार / अर्थ र व्यापार – सेयर कारोबारमा भ्याटको अन्यौलता भएपछि ब्रोकर कम्पनीहरुले कारोबार बन्द गरेका छन् । कम्पनीहरुलाई आन्तरिक राजश्व विभागअन्तर्गतका कर कार्यालयले भ्याट रकम दाखिला गर्न भन्दै पत्र पठाएपछि आज कारोबार बन्द भएको हो ।

४ वर्षअघिदेखि लिँदै आएको कमिसनमा समेत भ्याट रकम जोडेर बैंकमा दाखिला गर्न कर कार्यालयले ब्रोकर कम्पनीहरुलाई पत्राचार गरेपछि भ्याट सम्वन्धमा अन्यौलता थपिएको हो । नीतिगत व्यवस्था नै नभएको सम्वन्धमा पुरानो वर्षको कमिसनमा समेत अहिले आएर भ्याट रकम असुल्न खोजिएपछि ब्रोकर कम्पनीहरु आक्रोशित भएका छन्।

साथै कार्यालयले सम्पूर्ण ब्रोकर कम्पनीहरुलाई भ्याटमा दर्ता हुन समेत निर्देशन जारी गरेको छ । ब्रोकर एसोसिएसनले यस सम्वन्धमा आजै नेपाल धितोपत्र बोर्डसँग छलफल गरेको छ । यस सम्वन्धमा बोर्डले अर्थमन्त्रालयसँग छलफल गर्ने जनाएको छ । यद्यपी कारोबार भने रोकिन नहुनेमा बोर्डले जोड दिएको छ ।