१० साउन / अर्थ र व्यापार – गत आर्थिक वर्ष २०७३/७४ मा ५० शेयर ब्रोकरमध्ये कारोबार रकमका आधारमा अनलाइन सेक्युरिटीजले सबैलाई उछिनेको छ । गत बर्ष करिब पाँच खर्ब रुपैयाँको कारोबार भएकोमा अनलाइनले झन्डै २३ अर्ब रुपैयाँको खरिद बिक्रीमा मध्यस्थता गरेको हो । 

नेपाल स्टक एक्सचेन्ज (नेप्से) मा २०५० साल देखिनै कारोबार गराउने कम्पनीलाई २०६७ थपिएका नयाँ ब्रोकरले उछिनेका छन् । धेरै कारोबार गराउने १० ब्रोकर कम्पनीमा छ वटा नयाँ परेका हुन् । ब्रोकर नम्बर तीन ओपल सेक्युरिटीज कारोबार रकमका आधारमा ५० औँ स्थानमा छ । 

गत वर्ष ५० ब्रोकरले कुल चार खर्ब ९० अर्ब ७३ करोड ९८ लाख ९४ हजार एक रुपैयाँको शेयर कारोबार गराएका थिए । त्यसमध्ये अनलाइन (ब्रोकर नम्बर ४९) ले २२ अर्ब ६९ करोड ४४ लाख ३७ हजार पाँच सय ६६ रुपैयाँको कारोबार गराएको हो । यो कम्पनीले २०६७ सालमा ब्रोकर लाइसेन्स पाएको थियो ।

कारोबार रकमका आधारमा भिजन सेक्युरिटीज (ब्रोकर नम्बर ३४) दोस्रो र एबिसी सेक्युरिटीज (ब्रोकर नम्बर १७) तेस्रो स्थानमा छन् । भिजन नयाँ र एबिसी पुरानो कम्पनीको सूचीमा पर्छन् । खण्डेलवाला स्टक ब्रोकिङ कम्पनीका रुपमा स्थापित उक्त कम्पनीलाई २०५४ सालमा सजन कुमार अग्रवालले खरिद गरि एबिसी बनाएका थिए । 

कारोबार रकमका आधारमा चौथो स्थानमा इम्पेरीयल सेक्युरिटीज (ब्रोकर नम्बर ४५), पाचौँमा नाशा सेक्युरिटी (ब्रोकर नम्बर ५८) र छैटौँमा डाइनामिक मनि म्यानेजर्स (ब्रोकर नम्बर ४४)। सातौँ स्थानमा श्रीकृष्ण सेक्युरिटीज (ब्रोकर नम्बर २८), आठौँमा अग्रवाल सेक्युरिटी (ब्रोकर नम्बर ६), नवौँमा शनी सेक्युरिटीज (ब्रोकर नम्बर ४२) र दशौँ स्थानमा प्रिमो सेक्युरिटीज (ब्रोकर नम्बर १६) छन् ।