१२ मंसिर / अर्थ र व्यापार- बुधबार शेयर बजारमा सामान्य गिरावट देखिएपनि कारोबार रकम भने उल्लेख्य बढेको छ । नेप्से सुचक २.१० अंकले घटेर ११५९.३८ अंकमा झरेको छ । सेन्सेटिभ सूचक ०.४७ अंकले घटेर २४६.५२ अंकमा ओर्लियो ।

यो साताको आइतबार देखिनै सूचक घटेको भएपनि कारोबार रकम भने बढ्दो क्रममा देखिएको छ । आइतबार २५ करोड, सोमबार ३० करोड र मंगलबार २५ करोड रुपैयाँको कारोबार भएकोमा बुधबार कारोबार रकम ह्वात्तै बढेर ४० करोड रुपैयाँमाथि उक्लिएको छ । बुधवार सबैभन्दा बढी नेपाल बैंकको शेयर १५ करोड ६६ लाख रुपैयाँमा कारोबार भयो । पछिल्लो समय नेपाल बैंकको एफपिओ सकारेका अन्डरराइटरले दोस्रो बजारमा शेयर बिक्री गरेकाले कारोबार रकम बढेको हो ।

त्यस्तै उपसूचकहरु भने मिश्रित देखिएका छन् । अन्य बाहेक सबै उपसूचक घटेको छ । अन्य ०.२९ प्रतिशतले बढेको छ । विकास बैंक सबैभन्दा बढी घटेको छ ।