११ मंसिर / अर्थ र व्यापार- मंगलवार शेयर बजारमा सामान्य सुधार देखिएको छ । सोमबार लगानीकर्ताको आन्दोलनका बीच चलेको बजार घटे पनि मंगलबार भने १.६१ अंकले बढेर ११६१.४३ अंकमा बन्द भएको छ । मंगलबार १५४ कम्पनीका २३ करोड १६ लाख रुपैयाँको शेयर कारोबार भएको छ । सोमबारको तुलनामा मंगलबार कारोबार रकम भने घटेको छ । 

मंगलबार बैंकिङ, होटल, विकास बैंक, जलविद्युत र अन्य समूहका सूचक बढेका छन् । त्यस्तै वित्त कम्पनी, निर्जीवन बीमा, उत्पादन, लघुवित्त र जीवन बीमा कम्पनीका सूचक घटेका छन् । सोमबार जस्तै मंगलबार पनि एनएमबी बैंकको शेयर धेरै कारोबार भएको छ । अन्तिम मूल्य प्रतिकित्ता ३५८ रुपैयाँ कायम भएको बैंकको १ करोड ९४ लाख रुपैयाँको शेयर किनबेच भएको छ । यसैगरी नेपाल बैंकको १ करोड ६ लाख र नेपाल क्रेडिट एण्ड कमर्सिएल बैंकको १ करोड ४ लाखको शेयर किनबेच भएको नेप्सेले जनाएको छ । 

मंगलबारको कारोबारमा सूर्योदय लघुवित्तका लगानीकर्ताले सबैभन्दा धेरै कमाएका छन् । यो संस्थाको ८.३७ प्रतिशतले शेयर मूल्य बढेको छ । नेपाल हाइड्रो डेभलपर्स र कालिका लघुवित्तका शेयरधनी पनि कमाउनेको सूचीमा अग्रस्थानमा रहे ।  कारोबार अवधिभरमा एनएलजी इन्स्योरेन्सका लगानीकर्ताले सबैभन्दा धेरै गुमाएका छन् । कम्पनीको शेयर मूल्य ३.९ प्रतिशतले घटेको छ । स्वरोजगार लघुवित्त र तिनाउ विकास बैंकका लगानीकर्ताले पनि धेरै गुमाएका छन् ।