१३ मंसिर / अर्थ र व्यापार- बिहीबार शेयर बजार तीन बर्ष पछाडिको अंकमा फर्किएको छ । उच्चतम बिन्दुमा पुगेर घट्दो क्रममा रहेको सेयर वजारमा बिहीबार नेपाल स्टक एक्सचेन्ज (नेप्से) को कारोबार मापक सूचक १०.३७ अंकले घटेर ११४८.७० अंकमा झरेको छ ।

यसअघि २०७२ पुस २१ गते मंगलबार सूचक ११४६.११ अंकमा रहेको थियो । फेरि त्यही बिन्दुको सेरोफेरोमा बजार झरेको हो । त्यसबेला बजार बढ्दो क्रममा रहेको थियो । बढ्दो बजारले २०७२ साउन १२ गते उच्चतम बिन्दु १८८१.४५ अंक छोएको थियो । त्यसयता लगातार केही अंक घटरबढ हुँदै बजार निरन्तर घट्दो क्रममा देखिएको छ । साताभरी नै शेयर सूचक घट्दो क्रममा देखिएको छ । मंगलबार झिनो अंकको वृद्धि बाहेक साता भरिनै सूचक निरन्तर घटेको हो । समग्रमा साताभरि सूचक ३२.२४ अंकले घट्यो । 

बिहीबार कारोबार रकम औसत देखिएको छ । १६१ कम्पनीका १० लाख ६२ हजार कित्ता शेयर ३२ करोड २९ लाख रुपैयाँमा कारोबार भएको छ । सबैभन्दा बढी नेपाल बैकको पाँच करोड १९ लाख रुपैयाँ बराबरको शेयर कारोबार भयो । धेरैजसो म्याचिङ् कारोबारले बैकको कारोबार बढी देखिएको हो ।

त्यस्तै उसपसूचकहरु मिश्रित देखिए । सबैभन्दा बढि चिलिमे हाइड्रोपावर कम्पनीको शेयर करिब चार प्रतिशत बढ्यो । आइएमइ जनरल इन्स्योरेन्सको शेयरधनीले करिब ६ प्रतिशत गुमाए ।