२९ कात्तिक / अर्थ र व्यापार - नेपाल राष्ट्र बैंकले आजदेखी ब्याजदर करिडोर लागू गरेको छ । राष्ट्र बैंकले चालु आर्थिक वर्षको मौद्रिक नीतिमार्फ ब्याजदर करिडोरको व्यवस्था ल्याएको थियो । ब्याजदरमा स्थिरता ल्याउने उद्देश्यले ब्याजदर करिडोर लागू गरिएको राष्ट्र बैंककले जनाएको छ ।
चार महिनाअघि नै राष्ट्र बैंकले ब्याजदर करिडोरको व्यवस्था ल्याए पनि अन्तरबैंक ब्याजदर ३ प्रतिशतभन्दा तल भएकाले यो व्यवस्था लागु गर्न सकेको थिएन । अहिले ब्याजदरको अवस्था सही ठाउँमा भएकाले ब्याजदर करिडोर सम्बन्धी व्यवस्था लागू गरिएको राष्ट्र बैंकका अनुसन्धान विभाग प्रमुख नरबहादुर थापाले बताए । ‘ब्याजदर करिडोर लागू गर्नका लागि अहिले मुद्रा बजार उचित अवस्थामा छ,’ थापाले भने, ‘सरकारले ७२ अर्ब विकास ऋणपत्रसहित ९८ अर्ब आन्तरिक ऋण उठाएपछि बजारको अवस्था ठीक ठाउँमा पुगेको हो ।’

अन्तर बैंक ब्याजदर ३ प्रतिशतभन्दा तल झरेमा राष्ट्र बैंकले रिभर्स रिपो र दुईहप्ते निक्षेप बोलकबोलमार्फत बजारबाट पैसा खिच्छ । यसको विपरीत अन्तरबैंक ब्याजदर ५ प्रतिशतभन्दा बढी भए रिपोमार्फत बजारमा पैसा पठाउँछ । अहिले बजारमा २५ अर्ब रुपैयाँ अधिक तरलता छ । बुधबार राष्ट्र बैंकले १५ दिनका लागि २० अर्ब रुपैयाँ निक्षेप उठाउन लागेको छ। साथै यसका लागि ०.३०४५ प्रतिशत व्याजदर तोकिएको छ ।

राष्ट्रबैंकले ब्याजदर करिडोर कार्यान्वयनमा आएपछि बैंकका ग्राहकलाई पनि फाइदा हुने र हरेक तीन महिनामा निक्षेप तथा कर्जाको ब्याजदर परिवर्तनको सूचना नआउने अपेक्षा गरेको छ ।