२९ जेठ / अर्थ र व्यापार-दिनभरी नै उतारचढाव देखिएको बजार सोमबार पनि दोहोरो अंक नजिकले घटेको छ । निर्वाचनको अनिश्चितताले लगानीकर्ताको मनोविज्ञान कमजोर हुँदा सेयर बजार झर्न थालेको हो।
 
बजार ९.९७ अंकले घटेको छ । सोमबार कारोबार रकममा पनि उल्लेख्य गिरावट आएको छ । दिनभरीमा १३८ कम्पनीका जम्मा ४९ करोड ८८ लाख रुपैयाँको सेयर कारोबार भएको छ ।
 
कारोबार खुलेदेखि नै ओरालो लागेको सेयर बजार एक घण्टाभित्र १२ अंकले झरेको थियो। त्यसपछि सम्हालिएको बजार पौने एक बजे झिनो अंक बढेर हरियो भयो। थोरै समय १५९२ अंकमा रहेको बजार एक बजेपछि भने पुन घट्न थाल्यो।  

दिनभरीमा सात लाख ९८ हजार कित्ता शेयरको किनबेच भएको छ । सबैभन्दा बढी आरएसडिसी लघुवित्तको शेयर कारोबार भएको छ । आरएसडिसीको पाँच करोड ४४ लाख रुपैयाँको शेयर खरिद बिक्रि भएको हो। कारोबार रकमकै आधारमा नेपाल लाइफ इन्स्योरेन्स कम्पनी दोस्रो स्थानमा छ । कम्पनीको तीन करोड ५७ लाख रुपैयाँ बराबरको शेयर खरिद बिक्रि भएको छ ।
 
सोमाबर कारोबारमा आएका सबै उप सूचकमा गिरावट आएको छ । बैकिङ ७.४९, होटल २८.९९, विकास बैंक १२.९८, जलबिद्युत २३.३८, फाईनान्स २.४, बीमा ८१.०६, उत्पादनमूलक ७.३ र अन्य  १.७३ अंकले घटेको छ । 
 
आज सबैभन्दा बढी वल्ड मर्चेन्ट बैकिङ एण्ड फाईनान्स कम्पनीका शेयरधनीले १० प्रतिशतले कमाएका छन् भने एभरेस्ट बैंकका संस्थापक शेयरधनीले करिब १० प्रतिशत नै गुमाएका छन्।