२६ असार / अर्थ र व्यापार – मौद्रिक नीतिले लगानीकर्ता अन्यौलमा परेपछि सेयर बजार घटेको छ । साताको दोस्रो दिन पुँजी बजार ८.९३ अंकले झरेको छ । एक सय कम्पनीको सेयर कारोवार भएको आज बजार एक हजार ५ सय ७५.२२ अंकमा झरेर रोकिएको छ । 

राष्ट्र बैंकले मौद्रिक नीतिमार्फत सेयर धितो कर्जामा गरेको व्यवस्थाले ऋण पाइने अवस्था कायमै छ वा घट्यो भन्ने अन्यौलले नै बजार झरेको हो । राष्ट्र बैंकले आइतबार सार्वजनिक गरेको मौद्रिक नीतिमा बैंक तथा वित्तीय संस्थाले आफ्नो प्राथमिक पूँजीको ४० प्रतिशत बराबर मात्र सेयर धितो कर्जा दिन पाइने व्यवस्था गरेको छ । यसअघि प्राथमिक पूँजीको सत् प्रतिशत ऋण लगानी गर्न पाइन्थ्यो ।

बजारमा १५० कम्पनीको ६९ करोड ३५ लाख रुपैयाँ बराबरको सेयर किनबेच भएको छ । सेयर धितो कर्जाको अन्यौलले वित्तीय क्षेत्रका सबै उपसुचकहरु झरेका छन् । खासगरी बैंक, विकास बैंक र फाइनान्स कम्पनीको सुचक झर्दा समग्र बजार ओरालो लागेको हो । उत्पादनमूलक क्षेत्रको सुचक भने करिव ५६ अंकले बढेको छ ।

आज २८ लाख ६५ हजा ९२ कित्ता किनवेच भएको वजारमा ६९ करोड ३५ लाख ९७ हजार ५ सय ४१ रुपैयाँको कारोवार भएको छ । बैकिङ समूहको सूचक ८.७५ अंकले घटेको आज होटल समूहको सूचक १५.०८, विकास बैंक समूहको सूचक ११.५४, जलविद्युत समूहको सूचक १६.५३ अंकले ओरालो लागेको छ । 

फाइनान्स समूहको सूचक ३.०७ अंकले घटेको आज बीमा समूहको सूचक ५९.६३ र अन्य समूहको सूचक ४.०४ अंकले घटेको छ । आज उत्पादनमुलक समूहको सूचक मात्रै ५५.७५ अंकले बढेको छ । अन्य समूहको सूचक भने सवै रातो भएका छन् । 

बजारमा सबैभन्दा बढि सोल्टी होटलको सेयर किनबेच भएको छ । कम्पनीको सात करोड ३३ लाखको किनेबेच भएको हो। यसपछि नेपाल लाइफ इन्स्योरेन्सको तीन करो८ ८६ लाख, सेञ्चुरी कमर्सियल बैंकको तीन करोड ५० लाख रुपैयाँको सेयर किनबेच भएको छ ।

बजार घटे पनि वर्ल्ड मर्चेन्ट, कुबेर मर्चेन्टका लगानीकर्ताले कमाएका छन् । बढि गुमाउनेमा प्रोग्रेसिभ फाइनान्स, सिनर्जी पावर डेभलपमेन्टका लगानीकर्ता छन् ।