५ असार / अर्थ र व्यापार - डिम्याट प्रणाली लागु भएसँगै लगानीकर्ताले सेयर प्रमाणपत्र संकलन र संरक्षणको जन्झटबाट मुक्ति पाएका छन् । लगानीकर्तालाई आफ्नो डिम्याट खातामा कति शेयर छ र त्यसको भ्यालु कति पुग्यो भन्ने जानकारी दिन केन्द्रिय निक्षेप प्रणाली (सिडिएससी)ले वेबसाइटमा नयाँ सुविधा थप गरेको छ । भविष्यमा घरै बसी बसी यो वेबसाइटमा प्राथमिक शेयरमा समेत आवेदन दिन मिल्ने बनाउने छ ।

 सिडिएससीको वेबसाइट मेरोशेयर डट सिडिएससी डट कम डट एनपीमा लगानीकर्ताले आफ्नो शेयरको विवरण हेर्न मिल्ने गरि सुविधा थप गरेको छ । वेव पेजमा पोर्ट फोलिया ट्र्याकर सुविधा थप गरि लगानीकर्तालाई घरैबाट आफ्नो शेयर बजार मूल्य जाँच्ने अवसर दिएको छ । वेबसाइट मार्फत आफ्नो खातामा रहेको साथै आफुले खरिद र बिक्री गरेको शेयरको राफसाफ पनि हेर्न सकिनेछ । 

 यो सुविधा लिन लगानीकर्ताले आफुले डीम्याट खाता खोलेको निक्षेप सदस्यकोमा  गएर एउटा फर्म भर्नु पर्ने हुन्छ । फर्मको ५० रुपैयाँसम्म शुल्क लिन सक्ने व्यवस्था सिडिएससीले गरेको छ । त्यो फर्म भरेपछि निक्षेप सदस्यले ‘युजर नेम र पासवर्ड’ उपलब्ध गराउँछन् । सिडिएससीको वेबसाइटमा उक्त युजर नेम र पासवर्ड लगइन गरेपछि आफ्नो खातामा रहेको सबै विवरण हेर्न सकिने छ ।